ٹوبہ ٹیک سنگھ: معمولی گھریلو جھگڑے سے پنجاب کے ضلع ٹوبہ ٹیک سنگھ کا ایک پورا خاندان اجڑ گیا ہے. زہریلی چائے پینے سے بچوں کے بعد ان کی ماں بھی دم توڑ گئی۔'
ٹوبہ ٹیک سنگھ کے علاقے صدر میں زہر ملی چائے پینے سے 3 بچیاں اور ایک بچہ گزشتہ روز اور ایک بچی آج صبح انتقال کر گئی تھی، آج ان کی متاثرہ ماں نادیہ بھی الائیڈ اسپتال میں دم توڑ گئی ہے، جس کے بعد زہریلی چائے پینے سے جاں بحق افراد کی تعداد 6 ہو گئی۔
پولیس کے مطابق خاتون کا بیٹی کی شادی کے معاملے پر شوہر سے جھگڑا ہوا تھا، جس کے بعد یہ افسوس ناک واقعہ پیش آیا، اسپتال میں موت اور زندگی کی جنگ لڑنے والی بچوں کی ماں نے شوہر پر زہر دینے کا الزام عائد کیا تھا۔
گوجرہ میں 6 سالہ علی حسن، 7 سالہ اقرا، 18 سالہ مدیحہ، 22 سالہ ثانیہ اور ایک اور بچی کی نماز جنازہ آج ادا کی گئی، نماز جنازہ میں اہل علاقہ نے کثیر تعداد میں شرکت کی۔
گزشتہ روز زہریلی چائے پینے سے اموات کا مقدمہ بچوں کے ماموں کی مدعیت میں درج کر لیا گیا ہے، پولیس نے ملزم کو بھی گرفتار کر لیا ہے، تاہم ملزم نے بیوی بچوں کو زہریلی چائے پلانے کے الزام سے انکار کر دیا ہے۔
