اسلام آباد: وفاقی وزیر اطلاعات فواد چوہدری نے بھارتی گلوکارہ لتا منگیشکر کے انتقال پر افسوس کا اظہار کرتے ہوئے لیجنڈ گلوکارہ کے انتقال کر موسیقی کے ایک عہد کا خاتمہ قرار دیا۔
لتا منگیشکر کا انتقال موسیقی کے ایک عہد کا خاتمہ ہے، لتا جی نے عشروں تک سر کی دنیا پر حکومت کی اور ان کی آواز کا جادو رہتی دنیا تک رہے گا، جہاں جہاں اردو بولی اور سمجھی جاتی ہے وہاں لتا منگیشکر کو الوداع کہنے والوں کا ہجوم ہے، #LataMangeshkar
— Ch Fawad Hussain (@fawadchaudhry) February 6, 2022
سماجی رابطے کی ویب سائیٹ ٹوئٹر پر اپنے پیغام میں فواد چوہدری نے لکھا کہ کہا ہے کہ لتا منگیشکر کا انتقال موسیقی کے ایک عہد کا خاتمہ ہے، لتا جی نے عشروں تک سر کی دنیا پر حکومت کی اور ان کی آواز کا جادو رہتی دنیا تک رہے گا، جہاں جہاں اردو بولی اور سمجھی جاتی ہے وہاں لتا منگیشکر کو الوداع کہنے والوں کا ہجوم ہے۔
واضح رہے کہ طویل عرصے تک بھارت کی فلم انڈسٹری پر راج کرنے والی لیجنڈ گلوکارہ لتا منگیشکر 92 برس کی عمر میں دنیا سے رخصت ہو گئیں۔
بھارتی میڈیاہندوستان ٹائمز کے مطابق کورونا کی وجہ سے گزشتہ ماہ سے ممبئی کے بریچ کینڈ ہسپتال میں زیر علاج لیجنڈری گلوکارہ لتا منگیشکر انتقال کر گئیں ہیں۔انہیں گزشتہ روز حالت بگڑنے پر وینٹی لیٹر پر منقتل کیا گیا تھا۔
گلوکارہ کو کورونا کی وجہ سے ہسپتال میں داخل کرایا گیا تھا ان کا کورونا تو ٹھیک ہوگیا تھا تاہم بعد میں انہیں نمونیا ہوگیا جس کی وجہ سے وہ ہسپتال میں ہی زیر علاج رہیں گزشتہ رات لتا منگیشکر کی طبیعت مزید خراب ہوئی تو انہیں وینٹی لیٹر پر منتقل کیا گیا تھا مگر وہ صحت یاب نہ ہو سکیں اور دنیا سے رخصت ہو گئیں۔
بھارتی گلوکارہ لتا منگیشکر1929 میں پیدا ہوئیں اور1943 میں محض 13 سال کی عمر میں اپنا پہلا گانا ریکارڈ کروا کے اپنے کرئیر کا آغاز کیا، لتاجی نے مختلف زبانوں میں 25 ہزار سے زائد گانے گانوں میں اپنی آواز کے سر بکھیر کر گنیز بک آف ورلڈ ریکارڈ میں اپنا نام درج کروایا۔
