واٹس ایپ پر جلد یوزر نیم کا فیچر آ سکتا ہے، فون نمبر کی جگہ یوزر نیم سے رابطہ ممکن ہوگا

کیلیفورنیا : ابھی واٹس ایپ کے اکاؤنٹس صارفین کے فون نمبروں سے جڑے ہوتے ہیں، لیکن میٹا اس میں ایک بڑا بدلاؤ لانے والا ہے۔ کمپنی واٹس ایپ پر یوزر نیم کا فیچر متعارف کرانے کی تیاری کر رہی ہے، جس سے صارفین اپنے فون نمبر کے بغیر بھی واٹس ایپ استعمال کر سکیں گے۔

اس فیچر پر کافی عرصے سے کام ہو رہا ہے، لیکن ابھی یہ بیٹا ورژن میں بھی عام صارفین کے لیے دستیاب نہیں ہے۔ تاہم حال ہی میں کمپنی نے یوزر نیم ریزرو کرنے کا نظام متعارف کروایا ہے، جس کے ذریعے صارفین اپنا پسندیدہ یوزر نیم پہلے سے محفوظ کرا سکتے ہیں۔

WABetaInfo کی رپورٹ کے مطابق، واٹس ایپ کی سیٹنگز میں اب ایک نیا لنک شامل کیا جا رہا ہے جہاں سے لوگ اپنا یوزر نیم ریزرو کر سکیں گے۔ ابھی یہ فیچر محدود افراد کے لیے بیٹا ورژن میں دستیاب ہے، اور میٹا کی جانب سے ابھی تک اس کی رسمی تصدیق نہیں ہوئی۔

اگر یہ فیچر مکمل طور پر لاگو ہو گیا تو صارفین کو اپنے فون نمبر چھپانے کا اختیار مل جائے گا، یعنی وہ واٹس ایپ پر اپنا یوزر نیم شیئر کر کے رابطہ کر سکیں گے۔ اس سے پرائیویسی میں بہت بہتری آئے گی اور صارفین کا نمبر دوسروں کی نظر سے محفوظ رہے گا۔

اس کے علاوہ، صارفین اپنے یوزر نیم کو بدلنے کا بھی حق رکھیں گے، جس سے انہیں اپنے پروفائل پر زیادہ کنٹرول حاصل ہو گا۔ یہ تبدیلی واٹس ایپ کو ایک نئی شکل دے دے گی اور اسے مزید محفوظ اور آسان بنا دے گی۔