یوریشیا ہائر ایجوکیشن سمٹ 2026: استنبول میں ’پاکستان پویلین‘ کی دھوم، 42 رکنی وفد کی شرکت

استنبول:ترکیہ کے شہر استنبول میں منعقدہ عالمی "یوریشیا ہائر ایجوکیشن سمٹ 2026" میں پاکستان کی تعلیمی قوت کا بھرپور اظہار دیکھنے میں آ رہا ہے۔ سمٹ میں قائم کیا گیا ’پاکستان پویلین‘ عالمی شرکاء اور تعلیمی ماہرین کی توجہ کا مرکز بن گیا، جس کا باقاعدہ افتتاح استنبول میں پاکستان کے قونصل جنرل خواجہ خرم نعیم اور چیئرمین ایپ سپ (APSUP) پروفیسر ڈاکٹر چوہدری عبدالرحمان نے کیا۔
اس بین الاقوامی ایونٹ میں پاکستان کا 42 رکنی اعلیٰ سطح وفد شریک ہے، جس کی قیادت چیئرمین ایپ سپ پروفیسر ڈاکٹر چوہدری عبدالرحمان کر رہے ہیں۔ وفد میں ملک کی صفِ اول کی جامعات کے مالکان، وائس چانسلرز اور ماہرینِ تعلیم شامل ہیں جو عالمی سطح پر پاکستان کی اعلیٰ تعلیم کی صلاحیتوں کو روشناس کرا رہے ہیں۔
پاکستان پویلین میں ملک کے معتبر تعلیمی ادارے اپنی خدمات پیش کر رہے ہیں، جن میں درج ذیل جامعات شامل ہیں۔    سپیریئر یونیورسٹی، یونیورسٹی آف لاہور، اور یونیورسٹی آف فیصل آباد۔    یونیورسٹی آف سیالکوٹ، لاہور لیڈز یونیورسٹی، اور گفٹ یونیورسٹی۔    اقرا یونیورسٹی کراچی، انسٹی ٹیوٹ آف بزنس مینجمنٹ (IoBM)، اور رفاہ انٹرنیشنل یونیورسٹی۔    پریسٹن یونیورسٹی، سٹی یونیورسٹی، اور سیکوس یونیورسٹی۔
سمٹ کے دوران پاکستانی وفد نہ صرف مختلف علمی سیشنز میں حصہ لے رہا ہے بلکہ ترکیہ کی معروف جامعات کے دورے بھی کر رہا ہے۔ اس پلیٹ فارم کا بنیادی مقصد بین الاقوامی تعاون، مشترکہ تحقیق (Joint Research) اور عالمی تعلیمی روابط کو مستحکم کرنا ہے۔ چیئرمین ایپ سپ نے مختلف ممالک کے وفود سے ملاقاتیں کیں اور انہیں پاکستانی جامعات کے اغراض و مقاصد اور وہاں ہونے والی جدید تحقیق سے آگاہ کیا۔
اس موقع پر گفتگو کرتے ہوئے قونصل جنرل خواجہ خرم نعیم نے کہا کہ ہائر ایجوکیشن سمٹ میں پاکستان کی بھرپور شرکت انتہائی اہمیت کی حامل ہے۔ انہوں نے امید ظاہر کی کہ پاکستانی جامعات اس پلیٹ فارم کے ذریعے اپنے اہداف حاصل کرنے میں کامیاب ہوں گی، جس سے عالمی تعلیمی برادری میں پاکستان کا کردار مزید نمایاں ہوگا۔
ماہرین کے مطابق، اس پیمانے پر پاکستان کی شرکت اس بات کی عکاسی کرتی ہے کہ ملکی تعلیمی شعبہ اب عالمی معیار کے مطابق مسابقت کے لیے تیار ہے۔