بلوچستان شدید سردی کی لپیٹ میں، درجہ حرارت صفر تک گر گیا

کوئٹہ : بلوچستان میں موسم کی شدت نے شہریوں کو سخت سردی کی لپیٹ میں لے لیا ہے۔ محکمہ موسمیات کے مطابق، کوئٹہ میں درجہ حرارت صفر ڈگری سینٹی گریڈ تک پہنچ گیا، جب کہ قلات میں درجہ حرارت منفی دو ڈگری تک گر گیا ہے۔ سردی کی لہر نے پورے صوبے کو اپنی گرفت میں لے لیا ہے، خاص طور پر شمالی اضلاع میں صبح اور رات کے اوقات میں شدید سردی محسوس کی جا رہی ہے۔

محکمہ موسمیات نے اگلے 24 گھنٹوں کے دوران بلوچستان کے موسم کی پیشگوئی کی ہے جس کے مطابق صوبے کے بیشتر علاقوں میں موسم خشک اور شدید سرد رہے گا۔ شمالی اضلاع میں شدید سردی کی لہر جاری رہے گی، اور کوئٹہ سمیت دیگر شمال مغربی علاقوں میں مطلع ابر آلود رہنے کے امکانات ہیں۔ چند مقامات پر ہلکی بارش اور پہاڑوں پر ہلکی برفباری بھی ہو سکتی ہے، جس سے سردی میں مزید اضافہ متوقع ہے۔

آج صبح کوئٹہ میں درجہ حرارت صفر ڈگری ریکارڈ کیا گیا، جبکہ قلات اور زیارت میں منفی 2، ژوب میں 3، سبی میں 9، تربت میں 14، نوکنڈی میں 9 اور چمن میں 4 ڈگری سینٹی گریڈ درجہ حرارت ریکارڈ کیا گیا۔ بلوچستان کے ساحلی علاقے گوادر میں کم سے کم درجہ حرارت 18 ڈگری اور جیوانی میں 12 ڈگری سینٹی گریڈ ریکارڈ کیا گیا۔

محکمہ موسمیات نے شہریوں کو سردی سے بچاؤ کے لیے احتیاطی تدابیر اختیار کرنے کی ہدایت کی ہے، خاص طور پر بچوں اور بزرگوں کی حفاظت کو یقینی بنانے کی ضرورت ہے۔ لوگوں کو مشورہ دیا گیا ہے کہ وہ گرم لباس پہن کر سردی سے بچیں اور سرد موسم کے اثرات سے بچنے کے لیے گھروں سے باہر نکلتے وقت احتیاط برتیں۔