یورپ میں برفباری اور سرد موسم سے زندگی متاثر، 6 افراد ہلاک

برسلز: یورپ میں شدید برفباری اور سرد موسم کی شدت نے نظام زندگی کو بری طرح مفلوج کر دیا ہے۔ غیر ملکی میڈیا کے مطابق، اس وقت یورپ بھر میں موسم سرما اپنی شدت دکھا رہا ہے، جس کے باعث مختلف علاقوں میں برفباری ریکارڈ کی جا رہی ہے۔

رپورٹس کے مطابق، برفباری اور سرد موسم کی وجہ سے ہونے والے حادثات میں 6 افراد کی ہلاکت ہو گئی ہے۔ ان میں سے 5 افراد فرانس کے مختلف علاقوں میں برفباری کے دوران ہلاک ہوئے، جبکہ بوسنیا کے دارالحکومت سرائیوو میں بھی ایک خاتون کی موت کی خبر سامنے آئی ہے۔

یورپ بھر میں سینکڑوں پروازیں منسوخ کی جا چکی ہیں، جس کی وجہ سے ہزاروں مسافر پیرس اور ایمسٹرڈیم ایئرپورٹس پر پھنس گئے ہیں اور انہیں شدید مشکلات کا سامنا ہے۔ اس کے علاوہ، برفباری کے باعث سڑکوں پر ٹریفک کی روانی متاثر ہوئی ہے اور متعدد شاہراہیں بند ہو گئی ہیں۔