مادرِ وطن کی سرحدوں کے دفاع کے لیے پاک فضائیہ ہر وقت تیار ہے ، قوم کو اپنے شہداء کی قربانیوں پر فخر ہے، ایئر چیف مارشل

راولپنڈی : ملک بھر میں پاک فضائیہ کا یومِ شہداء 7 ستمبر کو نہایت عقیدت و احترام کے ساتھ منایا گیا۔ اس موقع پر تمام فضائی اڈوں پر خصوصی تقریبات منعقد کی گئیں، جن کا مقصد مادرِ وطن کی خاطر اپنی جانیں نثار کرنے والے شہداء کو خراجِ عقیدت پیش کرنا تھا۔

پاک فوج کے شعبہ تعلقات عامہ (آئی ایس پی آر) کے مطابق دن کا آغاز مساجد میں خصوصی دعاؤں اور قرآن خوانی سے ہوا، جو 1965ء اور 1971ء کی جنگوں سمیت قیامِ پاکستان سے لے کر آج تک جامِ شہادت نوش کرنے والے بہادر سپوتوں کے نام منسوب تھی۔

مرکزی تقریب ایئر ہیڈکوارٹرز اسلام آباد میں منعقد ہوئی، جس کے مہمانِ خصوصی پاک فضائیہ کے سربراہ ایئر چیف مارشل ظہیر احمد بابر سدھو تھے۔ ایئر چیف نے تقریب سے خطاب کرتے ہوئے پاک فضائیہ کی عظیم قربانیوں، پیشہ ورانہ مہارت اور شاندار روایات کو خراج تحسین پیش کیا۔

انہوں نے کہا کہ "یومِ شہداء ہماری مسلح افواج کی بے مثال بہادری اور قربانی کے جذبے کی علامت ہے۔ بدلتی ہوئی علاقائی اور عالمی صورتحال کے پیشِ نظر پاک فضائیہ اپنے دفاعی مشن پر پوری طرح کاربند ہے۔"

ایئر چیف مارشل نے اس عزم کا اعادہ کیا کہ پاک فضائیہ ملک کی خودمختاری اور علاقائی سالمیت کے تحفظ کے لیے خلا، الیکٹرانک وارفیئر، سائبر ٹیکنالوجی اور مقامی دفاعی پیداوار کے شعبوں میں اپنی صلاحیتوں کو مسلسل بہتر بناتی رہے گی۔

انہوں نے کہا کہ مادرِ وطن کی فضائی سرحدوں کے دفاع کے لیے پاک فضائیہ ہر وقت تیار ہے اور قوم کو اپنے شہداء کی قربانیوں پر فخر ہے۔ ایئر چیف نے مقبوضہ جموں و کشمیر کے عوام کے ساتھ غیر متزلزل یکجہتی کا بھی اظہار کیا اور ان کے حقِ خودارادیت کی جدوجہد کو سراہا۔

تقریب کے اختتام پر ایئر چیف مارشل ظہیر احمد بابر سدھو نے یادگارِ شہداء پر پھولوں کی چادر چڑھائی اور شہداء کے درجات کی بلندی کے لیے دعا کی۔