امریکا ایران جنگ بندی: بلاول بھٹو کا پاکستانی قیادت پر فخر، پی ٹی آئی کا امن کاوشوں کا اعتراف

اسلام آباد: خطے میں جنگ کے بادل چھٹنے اور امریکا و ایران کے درمیان جنگ بندی کے اعلان پر پاکستان کی سیاسی قیادت نے اسے ملک کی بڑی سفارتی فتح قرار دیا ہے۔ جہاں پیپلز پارٹی نے اسے پاکستان کی "قیادت" کا مظہر قرار دیا ہے، وہیں اپوزیشن نے بھی امن کاوشوں کو سراہتے ہوئے عوام کے لیے معاشی ریلیف کا مطالبہ کر دیا ہے۔
چیئرمین پاکستان پیپلز پارٹی بلاول بھٹو زرداری نے پاکستان کے سفارتی کردار پر فخر کا اظہار کرتے ہوئے کہا    پاکستان نے دانشمندی، عزم اور امن کے لیے غیر متزلزل وابستگی کے ساتھ عالمی سطح پر قیادت کا مظاہرہ کیا ہے۔    ہم تہران اور واشنگٹن کی قیادت کے معترف ہیں کہ انہوں نے تباہی کے بجائے مذاکرات کو چنا اور دنیا کو بڑی جنگ سے بچا لیا۔
چیئرمین پی ٹی آئی بیرسٹر گوہر نے محتاط لیکن مثبت ردعمل دیتے ہوئے کہا کہ     ایران اور امریکا کے درمیان جنگ بندی میں جس جس نے بھی مثبت کردار ادا کیا، ہم اسے سراہتے ہیں۔    اگرچہ حکومت نے ہمیں اس خفیہ ثالثی کے بارے میں اعتماد میں نہیں لیا تھا، لیکن اب جبکہ امن قائم ہو چکا ہے، تو حکومت کو چاہیے کہ عالمی منڈی کے اثرات عوام تک پہنچائے اور تیل کی قیمتوں میں فوری کمی کرے۔
تجزیہ کاروں کے مطابق، حکومت اور اپوزیشن دونوں کا ایک پیج پر آنا اس بات کی علامت ہے کہ پاکستان نے عالمی سطح پر اپنا کھویا ہوا مقام حاصل کر لیا ہے۔ سیاسی قیادت کی جانب سے اس پیش رفت کو سراہنا اس بات کی نوید ہے کہ اب پاکستان کی توجہ سفارتی کامیابیوں کے بعد معاشی استحکام کی طرف مڑے گی۔