پاکستان، ترکیہ اور آذربائیجان کا اتحاد خطے میں امن اور خودمختاری کا ضامن: وزیراعظم شہباز شریف

باکو: پاکستان اور ترکیہ نے باہمی دلچسپی کے علاقائی اور عالمی مسائل پر قریبی ہم آہنگی جاری رکھنے اور خطے اور وسیع مسلم دنیا میں امن، استحکام اور خوشحالی کے فروغ کے عزم کا اعادہ کیا ہے۔

یہ اتفاق رائے آج بیکو میں آذربائیجان کی فتح کے دن کی تقریب کے موقع پر وزیراعظم محمد شہباز شریف اور ترک صدر رجب طیب اردوان کے درمیان ہونے والی ملاقات میں ہوا، جس میں پاک فوج کے سربراہ جنرل سید عاصم منیر بھی موجود تھے۔

ملاقات میں دونوں رہنماؤں نے پاکستان اور ترکیہ کے درمیان تعلقات کے تمام پہلوؤں کا جائزہ لیا اور باہمی مفاد کے شعبوں میں تعاون کو مزید گہرا کرنے کے عزم کا اظہار کیا۔

وزیراعظم نے پاکستان اور ترکیہ کے درمیان دوستانہ تعلقات کے ہفتے کے جوش و خروش سے منائے جانے پر خوشی کا اظہار کیا، جس سے دونوں ممالک کے دیرینہ اور مضبوط تعلقات کا اظہار ہوا۔

انہوں نے کہا کہ پاکستان ترکیہ کے ساتھ اپنے برادرانہ تعلقات کو وسیع تر شراکت داری میں تبدیل کرنے کے لیے پرعزم ہے، جس میں سیاسی، دفاعی، اقتصادی، تجارتی، سرمایہ کاری اور عوامی سطح پر تعلقات شامل ہوں گے۔