پنجاب حکومت اور پرائیویٹ سیکٹر کے درمیان گندم کی خریداری کا معاہدہ طے

لاہور: پنجاب حکومت نے گندم کی فصل 3500 روپے فی من کی مقررہ قیمت پر خریدنے کے لیے پرائیویٹ سیکٹر کے ساتھ معاہدہ کرلیا ہے۔ وزیراعلیٰ پنجاب مریم نواز شریف کی زیرصدارت گندم کے حوالے سے اہم اجلاس میں یہ فیصلہ کیا گیا۔

اجلاس میں محکمہ زراعت کی جانب سے آئندہ سال کی گندم کی خریداری کے جامع منصوبے کی تفصیلی بریفنگ دی گئی، جس میں بتایا گیا کہ پنجاب میں گندم کی کوئی کمی نہیں اور وافر ذخائر موجود ہیں۔

وزیراعلیٰ پنجاب مریم نواز شریف نے کہا کہ کاشتکار ہمارے بھائی ہیں جنہیں ہم ہر صورت تنہا نہیں چھوڑیں گے۔ پاکستان کی تاریخ میں پہلی بار گندم کے کاشتکاروں کو ایک ہزار مفت ٹریکٹر فراہم کیے گئے ہیں۔ ساتھ ہی کسان کارڈ کے ذریعے اربوں روپے کی زرعی معاونت دی جا رہی ہے تاکہ کسانوں کی پیداواری صلاحیت کو فروغ دیا جا سکے۔

مریم نواز شریف نے مزید کہا کہ پنجاب میں ہر قسم کی کھاد کنٹرول ریٹ پر وافر مقدار میں دستیاب ہے تاکہ کسانوں کو بہتر سہولیات فراہم کی جا سکیں۔ یہ اقدامات گندم کی پیداوار کو بڑھانے اور کسانوں کے مسائل کے حل کے لیے حکومت کی سنجیدہ کوششوں کا حصہ ہیں۔