راولپنڈی : پاکستان سپر لیگ (پی ایس ایل) کے 10ویں ایڈیشن کی افتتاحی تقریب کی میزبانی راولپنڈی کرکٹ اسٹیڈیم کو سونپ دی گئی ہے۔ بورڈ کی جانب سے جاری کردہ اعلامیے کے مطابق، افتتاحی تقریب 11 اپریل (جمعہ) کو شام 7 بجے شروع ہوگی، جس میں معروف گلوکار اپنی پرفارمنس کا جادو جگائیں گے۔
اس روز افتتاحی میچ بھی کھیلا جائے گا، جس میں دفاعی چیمپئن اسلام آباد یونائیٹڈ اور لاہور قلندرز کے درمیان مقابلہ ہوگا، جو رات 8:30 پر راولپنڈی کرکٹ اسٹیڈیم میں شروع ہوگا۔ پی ایس ایل کے 10ویں ایڈیشن کے دوران ٹورنامنٹ 4 مختلف مقامات پر کھیلا جائے گا، جن میں کراچی کا نیشنل بینک اسٹیڈیم، لاہور کا قذافی سٹیڈیم، ملتان کرکٹ سٹیڈیم اور راولپنڈی کرکٹ اسٹیڈیم شامل ہیں۔
افتتاحی تقریب میں معروف صوفی گلوکار عابدہ پروین کی پرفارمنس کے ساتھ ساتھ ینگ سٹارز بھی اپنے فن کا مظاہرہ کریں گے۔ اس کے علاوہ، پی ایس ایل اینتھم کے لیے علی ظفر، ابرار الحق، نتاشا بیگ اور طلحہ انجم بھی اپنی آواز کا جادو جگائیں گے۔ تقریب کے دوران شائقین کو شاندار آتشبازی کا مظاہرہ بھی دیکھنے کو ملے گا۔
