جنرل ساحر شمشاد مرزا کو کنگ عبدالعزیز میڈل آف آنر ایوارڈ سے نوازدیا گیا

راولپنڈی :آئی ایس پی آر کے مطابق، چیئرمین جوائنٹ چیفس آف اسٹاف کمیٹی جنرل ساحر شمشاد مرزا کی سعودی مسلح افواج کے چیف آف جنرل اسٹاف جنرل فیاض بن حمید الرویلی سے اہم ملاقات ہوئی۔ اس ملاقات میں عالمی اور علاقائی حالات پر تفصیلی تبادلہ خیال کیا گیا، اور دوطرفہ دفاعی تعاون کو مزید فروغ دینے کے حوالے سے مختلف پہلوؤں پر بات چیت کی گئی۔

ملاقات میں پاک سعودی دفاعی تعلقات کو مزید مستحکم کرنے پر اتفاق کیا گیا، اور اس موقع پر جنرل ساحر شمشاد مرزا کو سعودی حکومت کی جانب سے کنگ عبدالعزیز میڈل آف آنر ایوارڈ سے نوازا گیا، جس کا مقصد اُن کی شاندار خدمات کا اعتراف تھا۔

سعودی عسکری قیادت نے پاکستان کی فوج کی پیشہ ورانہ مہارت کو سراہا اور دہشت گردی کے خلاف جنگ میں پاک فوج کی قربانیوں کی اہمیت پر زور دیا۔ دونوں ممالک نے اپنے دفاعی تعلقات کو مزید گہرا کرنے کے عزم کا اعادہ کیا اور پاک سعودی بھائی چارے کو مستحکم کرنے کی ضرورت پر اتفاق کیا۔