پرتھ : پی سی بی نے اعلان کیا ہے کہ اسپنر ابرار احمد 14 دسمبر سے پرتھ میں شروع ہونے والے آسٹریلیا کے خلاف پہلے ٹیسٹ میچ سے باہر ہو گئے ہیں۔
اپنے بیان میں بورڈ نے کہا کہ پرائم منسٹر الیون کے خلاف وارم اپ میچ کے دوران ابرار ’دائیں ٹانگ میں گھٹنے کے گرد شدید درد‘ کی وجہ سے میدان چھوڑ کر چلے گئے تھے۔
کرک انفو نے رپورٹ کیا کہ وارم اپ میچ کے تیسرے دن ابرار احمد 27 اوورز کرنے کے بعد میدان سے باہر چلے گئے تھے جس میں انہوں نے 80 رنز دے کر مارکس ہیرس کی وکٹ حاصل کی۔
پی سی بی کا کہنا ہے کہ میڈیکل ٹیم کی تشخیص کے دوران کھلاڑی کی عارضی تشخیص کی گئی تھی جس میں ایم آر آئی اسکین کی ضرورت محسوس ہوئی تھی، جو اسی دن کیا گیا تھا۔
بیان میں مزید کہا گیا ہے کہ ابرار احمد کا پرتھ میں پیر کے روز معائنہ کرنے کے بعد میڈیکل ٹیم کی نگرانی میں ری ہیبلیٹیشن جاری رہے گا تاکہ ان کی ریکوری ہوسکے۔
پی سی بی نے کہا کہ ’ابرار احمد ابھی تک ٹیسٹ سیریز سے باہر نہیں ہوئے ہیں، لیکن اس اور مستقبل کے دوروں کے لیے کھلاڑی کی فلاح و بہبود کو مدنظر رکھتے ہوئے، دوسرے ٹیسٹ سے قبل مزید تشخیص اس دورے پر ان کی دستیابی کا تعین کرے گا‘۔
دریں اثنا چیف سلیکٹر وہاب ریاض نے ٹیم انتظامیہ کی درخواست پر آف اسپنر ساجد خان کے نام کی منظوری دی ہے، جو سفر کے انتظامات کو حتمی شکل دینے کے بعد پرتھ روانہ ہوں گے۔
