آسٹریلیا، برونائی، ملائیشیا، انڈونیشیا ، سنگاپور اور فلپائن میں پہلا روزہ منگل کو ہوگا

اسلام آباد: آسٹریلیا ، برونائی دار الاسلام ، ملائیشیا ، انڈونیشیا، سنگاپور اور فلپائن میں رمضان المبارک کا چاند نظر نہیں آیا۔ پہلا روزہ 12 مارچ بروز منگل ہوگا۔ 

غیر ملکی میڈیا کے مطابق آسٹریلیا نے باضابطہ طور پر اعلان کیا ہے کہ کل بروز پیر شعبان کا آخری دن ہے اور منگل 12 مارچ کو رمضان المبارک کا پہلا دن ہوگا۔

آسٹریلیا کے مفتی اعظم نے فیڈرل کونسل آف امامز، آسٹریلوی فتویٰ کونسل اور فتویٰ اور شرعی ثالثی کونسل کے تعاون سے تصدیق کی ہے کہ پیر کو شعبان کا اختتام ہو گا اور منگل 12 مارچ کو پہلا روزہ ہو گا۔ 

برونائی

برونائی دار الاسلام نے اعلان کیا ہے کہ سلطنت میں رمضان المبارک کا چاند نظر نہ آنے کی وجہ سے منگل 12 مارچ کو رمضان المبارک کا پہلا دن ہے۔

ملائیشیا

ملائیشیا نے بھی اعلان کیا ہے کہ رمضان کا چاند نظر آنا ناممکن تھا اور منگل 12 مارچ کو مقدس مہینے کا پہلا دن ہوگا۔

انڈونیشیا

انڈونیشیا میں مذہبی امور کی وزارت نے اعلان کیا ہے کہ منگل کو رمضان المبارک کا پہلا دن ہے اور کل بروز پیر 30 شعبان ہے۔ انڈونیشیا میں تمام مشاہداتی مقامات پر رمضان المبارک کا چاند نظر نہیں آیا۔ 

سنگاپور

سنگاپور کے مفتی ڈاکٹر نذیر الدین محمد ناصر نے اعلان کیا کہ فلکیاتی حسابات کے مطابق اتوار کی شام کو سورج غروب ہونے پر رمضان کے مہینے کا چاند "سنگاپور کے افق سے اوپر نظر آنے کا امکان نہیں" ہے۔

اس طرح، مجھے یہ اعلان کرتے ہوئے خوشی ہو رہی ہے کہ ماہ رمضان کے روزے کا پہلا دن 12 مارچ 2024 بروز منگل ہے۔

فلپائن

فلپائن میں بنگسامورو دارالافتاء (BDI) نے اعلان کیا ہے کہ رمضان المبارک 12 مارچ بروز منگل شروع ہونے والا ہے کیونکہ اتوار کی رات چاند نظر نہیں آیا ۔

واضح رہے کہ سعودی عرب، یواے ای ، قطر اور دیگر خلیجی ممالک میں رمضان المبارک کا چاند دیکھنے کیلئے کمیٹیوں کے اجلاس جاری ہیں جہاں آج چاند نظر آنے کا قوی امکان ہے جبکہ پاکستان، بھارت اور بنگلہ دیش میں چاند کل نظر آسکتا ہے۔