ایران میں پانی کی شدید قلت: مشہد شہر کا پانی کا ذخیرہ 3 فیصد سے بھی کم، دارالحکومت تہران کی صورتحال بھی تشویشناک

تہران :  ایران کے دوسرے بڑے شہر مشہد میں پانی کا ذخیرہ خطرناک حد تک کم ہو چکا ہے اور اب شہر کے ڈیموں میں پانی کا ذخیرہ 3 فیصد سے بھی نیچے آ گیا ہے۔ مشہد میں پانی فراہم کرنے والی کمپنی کے چیف ایگزیکٹیو کے مطابق، شہر میں پانی کی فراہمی ایک سنگین مسئلہ بن چکی ہے، جس پر فوری طور پر قابو پانے کی ضرورت ہے۔

مشہد کی صورتحال اس وقت بہت تشویش ناک ہے جب کہ دارالحکومت تہران میں بھی پانی کی کمی شدت اختیار کر رہی ہے۔ ایرانی صدر مسعود پزشکیان نے گزشتہ دنوں خبردار کیا تھا کہ اگر بارشیں نہ ہوئیں تو اگلے ماہ تہران میں پانی کی فراہمی کو محدود کرنا پڑے گا، اور اگر خشک سالی کا یہ سلسلہ جاری رہا تو ایران کے بڑے شہروں میں پانی کی کمی اور بھی بڑھ سکتی ہے، جس کے باعث ممکنہ طور پر شہریوں کو نقل مکانی کرنا پڑے گی۔

ایرانی صدر نے موجودہ پانی اور توانائی کے وسائل کے انتظام کی اہمیت پر زور دیتے ہوئے اس صورتحال کو "انتہائی تشویشناک" قرار دیا تھا۔ ان کے مطابق، اس بحران کے اثرات صرف پانی کی فراہمی تک محدود نہیں رہیں گے بلکہ زرعی پیداوار اور توانائی کے وسائل پر بھی منفی اثرات مرتب ہوں گے۔

ایران میں جاری خشک سالی اور موسمی تبدیلیوں کی وجہ سے بارشوں کا معمولی ہونا اور پانی کے ذخائر کی کمی نے صورتحال کو سنگین بنا دیا ہے۔ ایران کی بڑھتی ہوئی آبادی اور بڑھتے ہوئے صنعتی تقاضے بھی پانی کی طلب میں اضافے کا سبب بن رہے ہیں، جس سے ملک میں پانی کی قلت مزید بڑھ رہی ہے۔

اگر یہ بحران برقرار رہا تو ایران کو نہ صرف پانی کی فراہمی کے نظام میں بہتری لانے کی ضرورت ہوگی بلکہ طویل مدتی حکمت عملی کی ضرورت بھی ہوگی تاکہ موسمی تبدیلیوں اور بڑھتی ہوئی آبادی کے اثرات سے نمٹا جا سکے۔