کراچی:پاکستان سٹاک ایکسچینج میں کاروباری ہفتے کے دوسرے روز شدید مندی کا سامنا رہا، اور انڈیکس نے ایک لاکھ 14 ہزار پوائنٹس کی حد کھو دی۔ کاروبار کا آغاز منفی تھا، لیکن تھوڑی دیر کے لیے مارکیٹ مثبت ہوئی، پھر دوبارہ انڈیکس میں گراوٹ دیکھی گئی۔
سٹاک مارکیٹ کے 100 انڈیکس میں 724 پوائنٹس کی کمی ریکارڈ کی گئی، جس کے بعد انڈیکس 113,632 پوائنٹس پر آ گیا۔ اس مندی کے باعث سرمایہ کاروں کو اربوں روپے کا نقصان ہوا۔
یاد رہے کہ گزشتہ روز کاروبار کے اختتام پر انڈیکس 114,356 پوائنٹس پر بند ہوا تھا۔
دوسری جانب، ایکسچینج کمپنیز ایسوسی ایشن کے مطابق انٹر بینک مارکیٹ میں ڈالر کی قیمت 7 پیسے کم ہو کر 280 روپے پر آ گئی ہے۔
