کوئٹہ :بلوچستان کے علاقے بولان میں دہشت گردوں نے جعفر ایکسپریس پر حملہ کر کے مسافروں کو یرغمال بنا لیا۔ سیکیورٹی فورسز نے علاقے کو گھیرے میں لے کر کلیئرنس آپریشن شروع کر دیا ہے۔
تفصیلات کے مطابق، آج بولان پاس کے قریب ڈھاڈر کے مقام پر دہشت گردوں نے ٹرین کو ٹنل میں روک کر معصوم شہریوں کو نشانہ بنایا۔ یرغمال بنائے گئے افراد میں خواتین اور بچے بھی شامل ہیں۔
سیکیورٹی ذرائع کا کہنا ہے کہ حملہ آور بیرون ملک موجود اپنے سہولت کاروں سے رابطے میں ہیں۔ دشوار گزار علاقے کے باوجود فورسز نے بروقت کارروائی کا آغاز کر دیا ہے اور دہشت گردوں کے خاتمے تک آپریشن جاری رہے گا۔
سیکیورٹی حکام کے مطابق، معصوم شہریوں پر حملہ اس بات کا ثبوت ہے کہ ان دہشت گردوں کا دین اسلام، پاکستان اور بلوچستان سے کوئی تعلق نہیں۔
