دشمن کو دیا گیا جواب ’حیران کن‘ تھا:’یومِ معرکہ حق‘ پر صدر زرداری کا پاک افواج کو خراجِ تحسین

اسلام آباد : صدرِ مملکت آصف علی زرداری نے مئی 2025 کے ’معرکہ حق‘ کی پہلی سالگرہ کے موقع پر پاک افواج کی پیشہ ورانہ مہارت اور جرات کو سراہتے ہوئے اس عزم کا اعادہ کیا ہے کہ پاکستانی قوم اور اس کی مسلح افواج ملک کی جغرافیائی حدود اور قومی مفادات کے تحفظ کے لیے مکمل طور پر تیار اور باصلاحیت ہیں۔
پاکستان مونیومنٹ اسلام آباد میں منعقدہ تقریب سے خطاب کرتے ہوئے صدر زرداری نے گزشتہ برس کے عسکری ٹکراؤ اور ملکی دفاعی پالیسی پر تفصیلی روشنی ڈالی۔ اس تقریب میں وزیراعظم شہباز شریف، فیلڈ مارشل سید عاصم منیر اور دیگر اعلیٰ حکام نے شرکت کی۔
    بھارت کو ’شاکنگ‘ جواب: صدر زرداری نے کہا کہ بھارت نے پہلگام کے خود ساختہ واقعے کی آڑ میں پاکستان کے شہریوں اور عبادت گاہوں پر بلا اشتعال حملے کیے، لیکن فیلڈ مارشل سید عاصم منیر کی قیادت میں ہماری افواج نے دشمن کو ایسا ’نپے تلے مگر حیران کن‘ جواب دیا جس نے ہماری قومی غیرت کو بلند کیا۔انہوں نے بتایا کہ پاک فضائیہ کے شاہینوں نے ہمت اور مہارت کی نئی داستان رقم کرتے ہوئے دشمن کے 8 جنگی طیارے مار گرائے۔ اسی طرح پاک بحریہ نے اپنی دفاعی طاقت سے بھارتی طیارہ بردار جہاز کو پیچھے ہٹنے پر مجبور کر دیا۔
 صدر نے وزیراعظم شہباز شریف اور فیلڈ مارشل عاصم منیر کی کوششوں کو سراہتے ہوئے کہا کہ پاکستان نے امریکہ اور ایران کے درمیان تنازع کو کم کرانے میں اہم کردار ادا کیا، جس کی بدولت پاکستان اب خطے میں امن قائم کرنے والے ایک مستحکم ملک کے طور پر ابھرا ہے۔ صدر زرداری نے سندھ طاس معاہدے کی معطلی کی بھارتی کوششوں کو شدید تنقید کا نشانہ بناتے ہوئے اسے ’ہائیڈرو ٹیررازم‘ (آبی دہشت گردی) قرار دیا اور کہا کہ پانی لاکھوں پاکستانیوں کی زندگی کا مسئلہ ہے۔انہوں نے مقبوضہ کشمیر میں بھارتی مظالم کی مذمت کی اور مسئلہ کشمیر کو اقوام متحدہ کی قراردادوں کے مطابق حل کرنے پر زور دیا۔ ساتھ ہی انہوں نے غزہ میں فلسطینیوں کی نسل کشی کو فوری طور پر روکنے کا مطالبہ بھی کیا۔
صدر نے اپنے خطاب کے آخر میں کہا کہ پاکستان کی یہ کامیابی محض عسکری نہیں تھی بلکہ یہ پوری قوم کے اتحاد اور فولادی عزم کی علامت تھی۔