صدر اور وزیراعظم کا قائداعظم کے 77ویں یوم وفات پر خراج عقیدت پیش

اسلام آباد: صدر مملکت آصف علی زرداری اور وزیراعظم محمد شہباز شریف نے قائداعظم محمد علی جناح کے 77ویں یوم وفات کے موقع پر انہیں خراج عقیدت پیش کیا ہے۔

 صدرمملکت آصف علی  زرداری 

 صدر زرداری نے پاکستانی عوام سے اپیل کی کہ وہ قائد کے انصاف، مساوات، رواداری اور جمہوریت کے وژن سے رہنمائی حاصل کریں۔صدر نے کہا کہ قائداعظم نے برصغیر کے مسلمانوں کے لیے ایک آزاد وطن کے قیام کے ساتھ ساتھ انہیں وقار، شناخت اور خودداری دی۔ انہوں نے کہا کہ قائداعظم کا خواب ایک ترقی پسند، جامع اور برابر حقوق کی حامل قوم کا تھا جہاں تمام شہری مساوی حقوق کے حقدار ہوں۔ بھارت میں اقلیتوں کے ساتھ بدسلوکی کے واقعات کا ذکر کرتے ہوئے صدر زرداری نے کہا کہ یہ حالات دو قومی نظریے کی صداقت کو ثابت کرتے ہیں اور پاکستان کا قیام ناگزیر تھا۔

وزیراعظم شہباز شریف

وزیراعظم شہباز شریف نے کہا کہ قائداعظم کی سیاسی بصیرت اور قیادت کی بدولت مسلمانوں کو ایک آزاد وطن ملا، جو دنیا کی پہلی نظریاتی اسلامی ریاست ہے۔ انہوں نے کہا کہ قائداعظم کا تصورِ پاکستان مذہبی آزادی، مساوی حقوق، جمہوریت، انصاف اور اقلیتوں کے تحفظ پر مبنی تھا۔

وزیراعظم نے کہا کہ قائداعظم کی سیاسی میراث ہی ملک کی ترقی اور خوشحالی کی بنیاد ہے اور قوم کو اسی رہنمائی پر چلتے ہوئے مسائل پر قابو پانا ہوگا۔