صدر اور وزیراعظم کی جانب سے قائداعظم محمد علی جناحؒ کو یوم ولادت پر خراج عقیدت

اسلام آباد : صدر مملکت آصف علی زرداری اور وزیراعظم محمد شہباز شریف نے بانی پاکستان قائداعظم محمد علی جناحؒ کے 149 ویں یوم پیدائش پر انہیں خراج عقیدت پیش کیا۔

صدر آصف علی زرداری نے اپنے پیغام میں کہا کہ آج کا دن قائداعظمؒ کی محنت، عزم اور یقین کی یاد دلاتا ہے جس نے پاکستان کی بنیاد رکھی۔ انہوں نے قائداعظمؒ کی جمہوریت، انصاف اور برابری کے اصولوں کا ذکر کرتے ہوئے کہا کہ یہ اقدار آج بھی ہمارے قومی سفر کا مرکز ہیں۔ صدر زرداری نے مزید کہا کہ قائداعظمؒ کے اصول پاکستان کی ترقی، سماجی ہم آہنگی اور اعتماد کے استحکام کے لیے ضروری ہیں۔ ان کا کہنا تھا کہ جب قوم مختلف چیلنجز کا سامنا کر رہی ہے، تو قائداعظمؒ کی قیادت اور نظریات آج بھی ہمیں رہنمائی فراہم کرتے ہیں۔

صدر زرداری نے نوجوانوں سے اپیل کی کہ وہ قائداعظمؒ کے اصولوں پر عمل کرتے ہوئے ایک پرامن اور مضبوط پاکستان کی تعمیر میں اپنا کردار ادا کریں۔

دوسری طرف، وزیراعظم محمد شہباز شریف نے بھی قائداعظمؒ کو خراج عقیدت پیش کرتے ہوئے کہا کہ قائداعظمؒ کا یوم پیدائش ہمیں ان کے اصولوں پر عمل کرنے کا عہد یاد دلاتا ہے۔ انہوں نے قائداعظمؒ کی تعلیمات کی اہمیت پر زور دیا اور کہا کہ انہوں نے ہر رنگ، نسل اور مذہب سے بالاتر ہو کر ہم آہنگی اور انصاف کا پیغام دیا۔ وزیراعظم شہباز شریف نے کہا کہ قائداعظمؒ نے پاکستان کا خواب حقیقت میں بدلا اور اس کے لیے تاریخ کا دھارا موڑ دیا۔

شہباز شریف نے قوم سے اپیل کی کہ وہ قائداعظمؒ کے نقشِ قدم پر چلتے ہوئے پاکستان کی وقار، حفاظت اور خوشحالی کے لیے متحد ہو کر کام کریں۔