ایشیا کپ کی تیاریاں مکمل، سپن باؤلرز ہمارا ہتھیار ہوں گے: ہیڈ کوچ مائیک ہیسن

 دبئی : قومی کرکٹ ٹیم کے ہیڈ کوچ مائیک ہیسن کا کہنا ہے کہ ایشیا کپ کے لیے ٹیم کی تیاریاں مکمل کر لی گئی ہیں، اور کھلاڑیوں کا مورال بلند ہے۔ انہوں نے امید ظاہر کی کہ قومی ٹیم ایونٹ میں شاندار کارکردگی کا مظاہرہ کرے گی۔

میڈیا سے گفتگو کرتے ہوئے مائیک ہیسن نے کہا کہ پاکستان کے پاس اس وقت بہترین سپن باؤلرز موجود ہیں، جو ایشیائی کنڈیشنز میں اہم کردار ادا کریں گے۔ ان کا کہنا تھا کہ ٹورنامنٹ میں سخت مقابلوں کی توقع ہے، تاہم ٹیم ان چیلنجز کے لیے پوری طرح تیار ہے۔

ہیڈ کوچ نے پاک بھارت مقابلے کے حوالے سے کہا کہ اس بار یہ میچ ایک نیا تجربہ ثابت ہوگا۔ "بھارتی ٹیم بھی پُراعتماد نظر آ رہی ہے، لیکن ہماری حکمتِ عملی واضح ہے اور کھلاڑی مکمل فوکس کے ساتھ میدان میں اتریں گے،" انہوں نے کہا۔

یاد رہے کہ ایشیا کپ رواں ماہ کے آخر میں شروع ہو رہا ہے، جس میں پاکستان اور بھارت کے درمیان ٹاکرا شائقین کی خاص توجہ کا مرکز ہوگا۔