شبمن گل جولائی 2025 کے آئی سی سی پلیئر آف دی منتھ قرار، شاندار کارکردگی نے ریکارڈ بریک کر دیے

دبئی: انٹرنیشنل کرکٹ کونسل (آئی سی سی) نے جولائی 2025 کے لیے بہترین کھلاڑی کا اعلان کر دیا ہے، اور یہ اعزاز بھارت کے نوجوان کپتان شبمن گل کو دیا گیا ہے۔

25 سالہ گل نے انگلینڈ کے خلاف ٹیسٹ سیریز میں زبردست بلے بازی کرتے ہوئے تین میچز میں 754 رنز بنائے، ان کی اوسط 75 رہی۔ اس دوران انہوں نے ایک ڈبل سنچری اور دو سنچریاں اسکور کیں۔

ایجبسٹن ٹیسٹ میچ میں انہوں نے 269 اور 161 رنز کی اننگز کھیل کر بھارت کو 336 رنز سے ایک تاریخی فتح دلائی۔ ان کا یہ کارنامہ انہیں انگلینڈ میں ٹیسٹ ڈبل سنچری بنانے والا پہلا بھارتی کپتان بنا گیا، جبکہ بیرونِ ملک یہ کارنامہ انجام دینے والے وہ دوسرے بھارتی قائد بنے۔

گل نے اپنی کارکردگی سے نہ صرف ٹیم کو فتح دلائی بلکہ سنیل گواسکر اور سچن ٹنڈولکر جیسے عظیم کھلاڑیوں کے پرانے ریکارڈز بھی پچھاڑ دیے۔

وہ مردوں کے بین الاقوامی کرکٹ میں آئی سی سی پلیئر آف دی منتھ کا اعزاز چار مرتبہ حاصل کرنے والے پہلے کھلاڑی بن چکے ہیں۔ اس کامیابی کو انہوں نے اپنے کیریئر کی بڑی پیش رفت اور بطور کپتان ایک یادگار لمحہ قرار دیا۔

اس ماہ کے اعزاز کے لیے انگلینڈ کے بین اسٹوکس اور جنوبی افریقہ کے ویان ملڈر بھی نامزد تھے، تاہم شبمن گل ان میں بازی لے گئے۔