اسلام آباد : قومی اسمبلی کا اجلاس آج ساڑھے 11 بجے ہوگا، جس کا 17 نکاتی ایجنڈا جاری کردیا گیا ہے۔ اجلاس میں مختلف اہم معاملات پر غور کیا جائے گا، جن میں ٹیکس ڈیجیٹلائزیشن کے لیے میکینسی فرم کی خدمات حاصل کرنے پر توجہ دلاؤ نوٹس بھی شامل ہے۔
اجلاس میں وزیر تجارت جام کمال، "مانع اغراق محصولات ترمیمی بل 2025" قومی اسمبلی میں پیش کریں گے، جبکہ وزیر داخلہ محسن نقوی "تحویل ملزمان ترمیمی بل 2024" اور "شہریت ترمیمی بل 2024" منظوری کے لیے ایوان میں پیش کریں گے۔
اجلاس میں مختلف قائمہ کمیٹیوں کی معیادی رپورٹس بھی پیش کی جائیں گی اور صدر مملکت کے مشترکہ اجلاس سے خطاب کی نقول ایوان میں پیش کی جائیں گی۔ وزیر پارلیمانی امور صدر مملکت کے مشترکہ اجلاس پر اظہار تشکر کی تحریک بھی پیش کریں گے۔ اس کے علاوہ، این اے 86 میں نئے گیس کنکشنز کی عدم فراہمی سے متعلق توجہ دلاؤ نوٹس بھی ایجنڈے کا حصہ ہوگا۔
