سابق کرکٹر عاقب جاوید کی بیٹی عقبہ عاقب رشتۂ ازدواج میں منسلک، شادی کی تصاویر وائرل

لاہور : پاکستان کرکٹ ٹیم کے سابق ٹیسٹ و ون ڈے کرکٹر اور قومی ٹیم کے موجودہ ہیڈ کوچ عاقب جاوید کی بیٹی عقبہ عاقب شادی کے بندھن میں بندھ گئی ہیں۔ عقبہ عاقب کی شادی برطانیہ میں ایک غیر ملکی نوجوان سے ہوئی، جس کی تصاویر ان کی والدہ، معروف شاعرہ و مصنفہ فرزانہ عاقب نے سوشل میڈیا پر شیئر کی ہیں۔

فرزانہ عاقب کی جانب سے فیس بک پر جاری کی گئی تصاویر میں عقبہ عاقب سفید عروسی لباس میں نظر آ رہی ہیں، جبکہ ان کے شوہر نے رسمی سوٹ پہن رکھا ہے۔ تصاویر میں دونوں کے بازوؤں پر موجود ٹیٹو بھی نمایاں دکھائی دیتے ہیں۔

فرزانہ عاقب نے اپنی پوسٹ میں بتایا کہ عقبہ عاقب کی شادی 9 اگست کو برطانیہ میں ہوئی۔ انہوں نے اپنی بیٹی، داماد اور دونوں خاندانوں کے لیے خوشگوار، کامیاب اور پُرسکون ازدواجی زندگی کی دعا بھی کی۔

عقبہ عاقب تعلیمی میدان میں بھی نمایاں پس منظر رکھتی ہیں۔ انہوں نے چند برس قبل برطانیہ کی یونیورسٹی آف سسیکس سے میڈیا اور انٹرنیشنل جرنلزم میں گریجویشن مکمل کی تھی۔

عقبہ عاقب کی والدہ فرزانہ عاقب ادبی دنیا میں بھی ایک معروف نام ہیں۔ وہ انگریزی شاعری اور دیگر ادبی تخلیقات کے حوالے سے جانی جاتی ہیں۔ ان کے فیس بک پیج کو تین لاکھ سے زائد افراد فالو کرتے ہیں، جبکہ ان کے مطابق وہ انگریزی شاعری کی 70 سے زائد کتابیں لکھ چکی ہیں اور متعدد بین الاقوامی ادبی اعزازات بھی حاصل کر چکی ہیں۔

فرزانہ عاقب نے اپنی ایک تصنیف میں اسلامی تاریخ کو انگریزی شاعری کے منفرد انداز میں بھی پیش کیا ہے۔

دوسری جانب عاقب جاوید پاکستان کے سابق ٹیسٹ اور ون ڈے کرکٹر ہونے کے ساتھ اس وقت قومی کرکٹ ٹیم کے تمام فارمیٹس کے ہیڈ کوچ کی ذمہ داریاں انجام دے رہے ہیں۔ وہ پی سی بی کی مینز نیشنل سلیکشن کمیٹی کے رکن بھی ہیں۔

عقبہ عاقب کی شادی کی تصاویر سوشل میڈیا پر سامنے آنے کے بعد کرکٹ اور ادبی حلقوں سے تعلق رکھنے والے افراد کی جانب سے عاقب جاوید، فرزانہ عاقب اور دونوں خاندانوں کو مبارکباد دینے کا سلسلہ جاری ہے۔