سونے کی قیمتوں میں بڑی کمی، خریداروں کے لیے خوشخبری

کراچی : ملک بھر میں آج سونے کے نرخوں میں نمایاں کمی ریکارڈ کی گئی ہے جس کے باعث قیمتی دھات کی قیمتیں واضح طور پر نیچے آگئی ہیں۔

آل پاکستان صرافہ جیمز اینڈ جیولرز ایسوسی ایشن کے مطابق فی تولہ سونا 8 ہزار 600 روپے سستا ہو کر 5 لاکھ 19 ہزار 962 روپے کی سطح پر پہنچ گیا ہے۔

اسی طرح 10 گرام سونے کی قیمت میں 7 ہزار 373 روپے کی کمی ہوئی ہے جس کے بعد نئی قیمت 4 لاکھ 45 ہزار 783 روپے مقرر کی گئی۔

دوسری جانب عالمی منڈی میں بھی سونے کے دام کم ہوئے ہیں جہاں فی اونس قیمت 86 ڈالر گھٹ کر 4 ہزار 972 ڈالر رہ گئی ہے۔

ماہرین کا کہنا ہے کہ عالمی سطح پر کمی کے اثرات مقامی بازاروں پر بھی پڑے ہیں، جس کے باعث سونے کی قیمتوں میں اچانک گراوٹ دیکھی گئی۔