تحریک کے90دن کل سےشروع ہوگئےہیں،اب آریاپارہوگا، علی امین گنڈا پور

لاہور: وزیراعلیٰ خیبرپختونخوا، علی امین گنڈا پور نے لاہور میں پریس کانفرنس کرتے ہوئے گنڈا پور نے کہا کہ پی ٹی آئی کے بانی کی رہائی کے لیے ایک تحریک شروع کی جا رہی ہے، جس میں پورے پاکستان سے عوام کو اکٹھا کیا جائے گا۔ انہوں نے کہا کہ 8 فروری کو قوم نے ثابت کر دیا کہ وہ جاگ چکی ہے اور پی ٹی آئی کے بانی کے خلاف لگائے گئے الزامات بے بنیاد ہیں۔

"پی ٹی آئی کے خلاف ظلم اور جبر کی کوئی سیاسی تاریخ نہیں ہے،" علی امین گنڈا پور نے کہا۔ "ہمارے خلاف مقدمات میں کچھ نہیں ملا، لیکن ریاستی ادارے ہماری سیاست میں مداخلت کر رہے ہیں۔"

گنڈا پور نے اپنے اداروں کی اصلاحات کی ضرورت پر زور دیتے ہوئے کہا کہ وقت آ گیا ہے کہ ہم اپنی غلطیوں کا اعتراف کریں اور ملک کے مفاد میں کام کریں۔ "ہم سب کو مل کر بیٹھنا چاہیے اور اصلاحات کی سمت طے کرنی چاہیے۔"

وزیراعلیٰ خیبرپختونخوا نے کہا کہ پی ٹی آئی کے بانی نے ہمیشہ کہا کہ سیاست کا مقصد صرف اقتدار حاصل کرنا نہیں، بلکہ آئندہ نسلوں کے لیے کام کرنا ہے۔ انہوں نے یہ بھی کہا کہ پی ٹی آئی کی مخصوص نشستیں چھین لی گئیں اور ان کی سیاسی جماعت کو ماضی میں ہونے والی زیادتیوں کے باوجود اپنے موقف پر ڈٹے رہنے کی ضرورت ہے۔ "ہم کل لاہور میں جلسہ کرنے کی اجازت طلب کریں گے، اور یہ جلسہ پرامن ہوگا۔"

گنڈا پور نے یہ بھی واضح کیا کہ بانی پی ٹی آئی کی رہائی ملک کی موجودہ سیاسی مشکلات کا حل ہے، اور ان کی رہائی کے بغیر پاکستان کے مسائل حل نہیں ہو سکتے۔ ترجمان کے مطابق، وزیراعلیٰ خیبرپختونخوا نے عوام سے اپیل کی کہ وہ بانی پی ٹی آئی کی رہائی کے لیے آواز اٹھائیں اور ان کے ساتھ اس تحریک میں شامل ہوں۔