معروف انفلوئنسر عبدو روزِق دبئی ایئرپورٹ پر مبینہ چوری کے الزام میں گرفتار

دبئی: مشہور سوشل میڈیا اسٹار اور گلوکار عبدو روزِق کو متحدہ عرب امارات کے ایئرپورٹ پر اس وقت حراست میں لے لیا گیا جب وہ مونٹی نیگرو سے واپسی پر دبئی پہنچے۔ عبدو روزِق کو علی الصبح پانچ بجے کے قریب گرفتار کیا گیا، تاہم حکام کی جانب سے تاحال گرفتاری کی کوئی باقاعدہ تصدیق یا تفصیل جاری نہیں کی گئی۔

ایک کمپنی ترجمان نے خلیج ٹائمز کو بتایا، ’’ہم صرف اتنا کہہ سکتے ہیں کہ عبدو روزِق کو چوری کے الزام کے تحت حراست میں لیا گیا ہے، مزید تفصیلات فی الحال فراہم نہیں کی جا سکتیں۔‘‘

عبدالرزاق محمد، جو عبدو روزِق کے نام سے مشہور ہیں، ایک ہارمونل بیماری کے باعث صرف تین فٹ سے کچھ زیادہ قد رکھتے ہیں۔ وہ مشرق وسطیٰ میں نوجوان مشاہیر میں سے ایک ہیں اور کئی برسوں سے دبئی میں مقیم ہیں۔ انہیں یو اے ای کا گولڈن ویزا بھی حاصل ہے۔

انہوں نے موسیقی، مزاحیہ ویڈیوز اور ریئلٹی شوز خصوصاً بگ باس 16 میں شرکت کے ذریعے شہرت حاصل کی۔ سال 2024 میں انہوں نے دبئی کے کوکا کولا ایرینا میں باکسنگ کا آغاز کیا اور برطانیہ میں اپنا ریستوران برانڈ حبیبی بھی متعارف کرایا۔

اسی برس انہیں بھارت میں ایک ہوٹلنگ کمپنی کے خلاف جاری منی لانڈرنگ تحقیقات کے سلسلے میں انفورسمنٹ ڈائریکٹوریٹ نے بھی پوچھ گچھ کے لیے بلایا تھا، تاہم وہ اس کیس میں ملزم نامزد نہیں تھے۔

فی الحال عبدو روزِق کی گرفتاری سے متعلق مزید معلومات کا انتظار ہے۔