امریکی صدر ڈونلڈ ٹرمپ غزہ امن سربراہی اجلاس میں شرکت کے لیے شرم الشیخ پہنچ گئے

شرم الشیخ : امریکی صدر ڈونلڈ ٹرمپ غزہ میں جاری جنگ کے خاتمے اور مشرقِ وسطیٰ میں دیرپا امن کے قیام کے لیے منعقدہ امن سربراہی اجلاس میں شرکت کے لیے مصر کے سیاحتی شہر شرم الشیخ پہنچ گئے۔

صدر ٹرمپ کا استقبال مصری صدر عبدالفتاح السیسی نے کیا۔ دونوں رہنما اس اہم بین الاقوامی کانفرنس کی مشترکہ میزبانی کر رہے ہیں، جس میں دنیا کے 20 سے زائد ممالک کے سربراہان کی شرکت متوقع ہے۔

کانفرنس کا مقصد غزہ کی پٹی میں جاری جنگ بندی کو یقینی بنانا، علاقائی استحکام کو فروغ دینا، اور امریکی صدر کی جانب سے پیش کردہ "غزہ امن منصوبے" پر دستخط کرنا ہے۔ اس منصوبے کے تحت جنگ بندی، قیدیوں کا تبادلہ، انسانی امداد کی بحالی، اور ایک عبوری بین الاقوامی نگرانی کی تجویز شامل ہے۔

ذرائع کے مطابق، اجلاس کے دوران ایک مشترکہ اعلامیہ جاری کیے جانے کا امکان ہے، جس میں فریقین کے درمیان طے پانے والے نکات کی تفصیل دی جائے گی۔

یہ کانفرنس ایسے وقت میں ہو رہی ہے جب عالمی برادری غزہ کی صورتحال پر شدید تشویش کا اظہار کر چکی ہے، اور خطے میں پائیدار امن کے لیے سفارتی کوششوں میں تیزی آئی ہے۔