صدر آصف زرداری کا چینگڈو میں گولڈن پانڈا کلچر فورم سے خطاب

صدر مملکت آصف زرداری نے چینگڈو میں دوسرے گولڈن پانڈا انٹرنیشنل کلچر فورم سے خطاب کرتے ہوئے کہا کہ فنکاروں کی تخلیقی صلاحیتیں سرحدوں سے آزاد ہوتی ہیں اور یہ لوگوں کو متحد کرتی ہیں۔ انہوں نے چین کے ثقافتی تبادلے اور باہمی سیکھنے کے وژن کی مکمل حمایت کا اظہار کیا۔

صدر زرداری نے کہا کہ گولڈن پانڈا فورم تہذیبوں کی تنوع، ثقافتوں میں مساوات اور عوامی تبادلوں کو فروغ دیتا ہے جبکہ فن ایک عالمی زبان ہے جو فاصلوں کو مٹا دیتی ہے۔ انہوں نے پاکستان اور چین کی دوستی کو باہمی احترام اور تعاون کی بہترین مثال قرار دیا۔

انہوں نے ثقافت کو امن، خوشحالی اور مشترکہ مستقبل کے لیے اہم پل قرار دیتے ہوئے ایوارڈ حاصل کرنے والوں کو خراج تحسین پیش کیا۔ صدر نے سچوان میں مسٹر لی شولی، ممبر پولیٹیکل بیورو اور وزیر پبلسٹی ڈیپارٹمنٹ کی مہمان نوازی پر بھی شکریہ ادا کیا۔