دانیال عزیز پی ٹی آئی سے الیکشن لڑنا چاہتے تھے، ادھر سے گھاس نہیں ڈالی گئی تو آخری دن ٹکٹ لینے پہنچ گئے: احسن اقبال

شکرگڑھ : مسلم لیگ ن کے سیکرٹری جنرل اور سابق وفاقی وزیر منصوبہ بندی احسن اقبال نے الزام لگایا ہےکہ دانیال عزیز اندرونی طور پر  پی ٹی آئی کی ٹکٹ کی دوڑ  میں تھے، پی ٹی آئی نےگھاس نہ ڈالی تو  آخری روز  ٹکٹ لینے  پہنچ گئے۔

اپنے حلقہ انتخاب شکرگڑھ میں تقریب سے خطاب کرتے احسن اقبال کا کہنا تھا کہ دانیال عزیز  نے پی ٹی آئی کے چکر میں ٹکٹ کے لیے درخواست تک نہ دی تھی، پی ٹی آئی کو خوش کرنے کے لیے ہمارے خلاف  پریس کانفرنس کی۔

 احسن اقبال کا کہنا تھا کہ 2013 میں بھی ن لیگ قیادت دانیال عزیز کو ٹکٹ دینےکےحق میں نہیں تھی، میں نے دانیال عزیز کے لیے 20 منٹ کے دلائل دیے، وفاداری کی گارنٹی بھی دی۔