ایران کے ساتھ 49 سالہ جمود ٹوٹ گیا، اب صرف جامع ڈیل ہی قبول ہوگی:امریکی نائب صدر 

جارجیا : امریکی نائب صدر جے ڈی وینس نے کہا ہے کہ امریکہ اور ایران کے درمیان مذاکرات ایک ایسے مرحلے پر پہنچ چکے ہیں جو گزشتہ نصف صدی میں نہیں دیکھا گیا، تاہم صدر ڈونلڈ ٹرمپ کسی عارضی یا چھوٹی ڈیل کے بجائے ایک مکمل "جامع معاہدے" کے خواہاں ہیں۔
یونیورسٹی آف جارجیا میں ایک تقریب سے خطاب کرتے ہوئے جے ڈی وینس نے واضح کیا کہ  تاریخی مذاکرات: گزشتہ 49 برسوں میں پہلی بار امریکہ اور ایران کے درمیان اتنے اعلیٰ سطح کے براہِ راست رابطے ہوئے ہیں۔  صدر ٹرمپ چھوٹی ڈیل اس لیے قبول نہیں کر رہے کیونکہ وہ ایک ایسی "عظیم ڈیل" چاہتے ہیں جو دنیا بھر کے لیے فائدہ مند ہو اور جس کے بعد ایران کبھی جوہری ہتھیار حاصل نہ کر سکے۔
نائب صدر کے مطابق دہائیوں پر محیط عدم اعتماد کو ختم کرنے میں وقت لگے گا، لیکن ایرانی مذاکرات کار اب سنجیدگی کا مظاہرہ کر رہے ہیں۔
اپنے حالیہ دورہ پاکستان کا ذکر کرتے ہوئے جے ڈی وینس نے کہا کہ  میں نے اسلام آباد میں بھی اس بات کا اعتراف کیا تھا کہ مذاکرات میں غیر معمولی پیش رفت ہوئی ہے، تاہم حتمی اور جامع ڈیل تک پہنچنے کے لیے مزید کام باقی ہے۔ فی الوقت فریقین کے درمیان جنگ بندی برقرار ہے اور صورتحال بہتری کی جانب گامزن ہے۔
جے ڈی وینس نے مزید کہا کہ ایک جامع ڈیل کے نتیجے میں ایرانی عوام کے لیے عالمی معیشت کے دروازے کھل سکتے ہیں، جو خطے اور دنیا کی ترقی کے لیے ایک مثبت قدم ہوگا۔ انہوں نے اس عزم کا اظہار کیا کہ امریکہ نیک نیتی کے ساتھ اس عمل کو آگے بڑھا رہا ہے۔