علاقائی امن مشن: وزیراعظم شہباز شریف سعودی عرب، قطر اور ترکیہ کے  دورے پر روانہ ہوں گے

اسلام آباد: وزیراعظم شہباز شریف مشرقِ وسطیٰ کی کشیدہ صورتحال، آبنائے ہرمز کی ناکہ بندی اور امریکہ-ایران مذاکرات کے اگلے دور پر اہم مشاورت کے لیے سعودی عرب، قطر اور ترکیہ کا دورہ کریں گے۔ یہ دورہ ایک ایسے وقت میں ہو رہا ہے جب پاکستان خطے میں امن کے لیے کلیدی ثالث کا کردار ادا کر رہا ہے۔
وزیراعظم اپنے دورے کے پہلے مرحلے میں کل سعودی عرب پہنچیں گے جہاں وہ ولی عہد شہزادہ محمد بن سلمان سے ملاقات کریں گے۔ اس ملاقات کے اہم نکات درج ذیل ہیں۔  امریکہ اور ایران کے درمیان اسلام آباد میں ہونے والے حالیہ مذاکرات کی پیش رفت پر ولی عہد کو اعتماد میں لیا جائے گا۔
پاکستان اور سعودی عرب کے درمیان اقتصادی تعاون اور سرمایہ کاری کے اہم منصوبوں پر بھی تبادلہ خیال ہوگا۔سعودی عرب کے بعد وزیراعظم قطر اور ترکیہ روانہ ہوں گے۔تہران اور واشنگٹن کے درمیان جاری سفارتی کوششوں میں قطر کے کردار اور علاقائی سلامتی پر مشاورت ہوگی۔وزیراعظم ترک قیادت سے آبنائے ہرمز کی صورتحال اور مسلم ممالک کے مشترکہ مفادات پر گفتگو کریں گے۔
سفارتی ذرائع کا کہنا ہے کہ وزیراعظم کا یہ دورہ امریکہ اور ایران کے درمیان مذاکرات کے اگلے مرحلے کو کامیاب بنانے اور خطے میں توانائی کی ترسیل (آبنائے ہرمز) کو بحال رکھنے کے لیے انتہائی اہمیت کا حامل ہے۔ پاکستان کی کوشش ہے کہ برادر اسلامی ممالک کو اعتماد میں لے کر ایک مربوط علاقائی حکمتِ عملی وضع کی جائے۔