وزیراعظم شہباز شریف کا سعودی عرب، قطر اور ترکیہ کا دورہ مکمل: علاقائی امن اور معاشی استحکام کے نئے دور کا آغاز

لاہور / اسلام آباد:وزیراعظم محمد شہباز شریف سعودی عرب، قطر اور ترکیہ کے کامیاب ترین دورے مکمل کر کے ترکیہ سے پاکستان کے لیے روانہ ہو گئے ہیں۔ ان دوروں کو پاکستان کی خارجہ پالیسی اور معاشی سفارتکاری کے حوالے سے انتہائی اہمیت کا حامل قرار دیا جا رہا ہے۔
وفاقی وزیر اطلاعات و نشریات عطا تارڑ نے سوشل میڈیا پر اپنے ایک خصوصی پیغام میں وزیراعظم کے ان دوروں کی تفصیلات بتاتے ہوئے کہا کہ     وزیراعظم نے سعودی عرب، قطر اور ترکیہ کی اعلیٰ قیادت سے ملاقاتیں کیں جن میں تجارت، سرمایہ کاری اور دفاعی تعاون پر اہم پیش رفت ہوئی۔    ان دوروں کے ذریعے برادر ممالک کے ساتھ پاکستان کے دیرینہ تعلقات کو جدید معاشی شراکت داری میں تبدیل کرنے کا عزم دہرایا گیا۔عطا تارڑ کا مزید کہنا تھا کہ پاکستان خطے میں پائیدار امن کے قیام کے لیے اپنی سفارتی کوششیں مسلسل جاری رکھے ہوئے ہے۔ وزیراعظم نے عالمی فورمز اور انفرادی ملاقاتوں میں پاکستان کا یہ موقف واضح کیا کہ خطے کی ترقی امن و استحکام سے جڑی ہوئی ہے۔
وزیراعظم شہباز شریف کی ترکیہ سے روانگی کے موقع پر ترک حکام نے انہیں الوداع کیا۔ اپنے اس دورے کے دوران وزیراعظم نے غزہ کی صورتحال اور مشرقِ وسطیٰ میں بڑھتی ہوئی کشیدگی کو روکنے کے لیے بھی مسلم ممالک کے مابین مشترکہ حکمتِ عملی پر زور دیا۔ سیاسی حلقوں کے مطابق ان دوروں سے پاکستان میں غیر ملکی سرمایہ کاری کی راہ ہموار ہوگی۔