پاکستان، افغانستان اور چین کے وزرائے خارجہ کے درمیان سہ فریقی اجلاس 20 اگست کو کابل میں ہوگا

کابل / اسلام آباد:پاکستان، افغانستان اور چین کے درمیان وزرائے خارجہ سطح کے سہ فریقی مذاکرات کا شیڈول طے پا گیا ہے۔ یہ اہم اجلاس 20 اگست کو افغان دارالحکومت کابل میں منعقد ہوگا۔

سفارتی ذرائع کے مطابق، ملاقات میں تینوں ممالک کے وزرائے خارجہ شرکت کریں گے اور خطے کی سیکیورٹی، باہمی تعاون، اقتصادی روابط، انسدادِ دہشت گردی اور افغان امن عمل جیسے اہم موضوعات زیرِ بحث آئیں گے۔

اجلاس کا مقصد خطے میں امن، استحکام اور ترقی کے لیے مشترکہ کوششوں کو فروغ دینا ہے، جبکہ بیلٹ اینڈ روڈ انیشی ایٹو (BRI) کے تناظر میں علاقائی روابط اور اقتصادی تعاون پر بھی تبادلہ خیال متوقع ہے۔

یہ سہ فریقی مذاکرات ایسے وقت ہو رہے ہیں جب افغانستان کی اندرونی صورتحال اور خطے کی جغرافیائی سیاست میں مسلسل تغیر دیکھا جا رہا ہے، اور تمام فریقین اس بات کے خواہاں ہیں کہ تعاون کی راہیں تلاش کی جائیں۔