وزیراعظم شہباز شریف سے چینی کاروباری وفد کی ملاقات: پاکستان میں ڈیجیٹل اکانومی ہیڈکوارٹر قائم کرنے کا فیصلہ، بزنس تعاون پر اطمینان کا اظہار

اسلام آباد : وزیراعظم محمد شہباز شریف سے چین کے ایک اہم 11 رکنی اعلیٰ سطح کے کاروباری وفد نے ملاقات کی ہے۔ ملاقات میں پاک چین اقتصادی تعلقات، ڈیجیٹل معیشت اور کاروباری سطح پر تعاون بڑھانے کے امور پر تفصیلی تبادلہ خیال کیا گیا۔ وزیراعظم نے چین کے مایہ ناز آئی بی آئی (IBI) گروپ کی جانب سے پاکستان میں اپنا "ڈیجیٹل اکانومی ہیڈکوارٹر" قائم کرنے کے فیصلے کا خیرمقدم کرتے ہوئے اسے دونوں ممالک کے تجارتی تعلقات میں ایک سنگ میل قرار دیا ہے۔
ملاقات کے دوران گفتگو کرتے ہوئے وزیراعظم شہباز شریف کا کہنا تھا کہ  پاکستان اور چین کے درمیان تعلقات کی بنیادیں انتہائی گہری اور تاریخی ہیں، اور دونوں ممالک ہر مشکل وقت میں ایک دوسرے کے ساتھ کھڑے رہے ہیں۔
 صدر شی جن پنگ کی مدبرانہ اور وژنری قیادت میں چین نے معاشی اور ٹیکنالوجی کے میدان میں دنیا بھر میں شاندار اور بے مثال ترقی کی ہے۔وزیراعظم نے اعلان کیا کہ وہ رواں ماہ کے آخر میں اپنے شیڈول دورۂ چین کے لیے انتہائی پرامید اور منتظر ہیں، جہاں دونوں ممالک کے درمیان اسٹریٹجک شراکت داری کو مزید آگے بڑھایا جائے گا۔
وزیراعظم نے چینی وفد کو یقین دلایا کہ حکومت پاکستان میں سرمایہ کاری کرنے والے چینی کاروباری اداروں کو ہر ممکن سہولیات فراہم کرے گی۔ انہوں نے پاکستان اور چین کے نجی شعبوں کے درمیان (Business-to-Business) بڑھتے ہوئے روابط اور تعاون پر مکمل اطمینان کا اظہار کیا۔ ماہرین کا کہنا ہے کہ آئی بی آئی گروپ کی جانب سے پاکستان میں ڈیجیٹل اکانومی ہیڈکوارٹر کا قیام ملکی آئی ٹی سیکٹر، ای کامرس اور ڈیجیٹل فنانس کے لیے گیم چینجر ثابت ہو سکتا ہے۔