مالیاتی شمولیت کے فروغ کے لیے حکومتی اقدامات کی مکمل حمایت جاری رہے گی: عطا اللہ تارڑ

اسلام آباد: حکومت کا کیش لیس معیشت کی جانب پیش رفت تیز کرنے کا عزم، ڈیجیٹل مالیاتی سہولیات کے فروغ پر زور

وفاقی وزیر اطلاعات و نشریات عطا اللہ تارڑ نے کہا ہے کہ حکومت مالیاتی نظام میں زیادہ سے زیادہ افراد کی شمولیت اور ملک کو کیش لیس معیشت کی طرف لے جانے والے اقدامات کی مکمل حوصلہ افزائی کر رہی ہے۔

انہوں نے اسلام آباد میں جے ایس بینک کے تحت زیڈ والٹ (Z-Wallet) کی افتتاحی تقریب سے خطاب کرتے ہوئے کہا کہ جدید ٹیکنالوجی کے ذریعے شہریوں تک مالیاتی سہولیات کی رسائی آسان بنانا وقت کی اہم ضرورت ہے۔

وفاقی وزیر نے زونگ، زِنڈیجی اور جے ایس بینک کے درمیان تعاون کو سراہتے ہوئے کہا کہ ٹیلی کمیونیکیشن اور بینکاری کے شعبوں کا اشتراک مالیاتی شمولیت کو بڑھانے میں اہم کردار ادا کرسکتا ہے۔

عطا اللہ تارڑ کے مطابق زیڈ والٹ جیسے منصوبے موبائل رابطے، ٹیکنالوجی اور انٹرنیٹ بینکنگ کو ایک پلیٹ فارم پر لا کر عام شہریوں کے لیے مالی خدمات کے استعمال کو زیادہ آسان بنا سکتے ہیں۔ انہوں نے کہا کہ شہری ان پلیٹ فارمز کے ذریعے مالیاتی سہولیات حاصل کرسکیں گے جنہیں وہ پہلے ہی روزمرہ زندگی میں استعمال کر رہے ہیں۔

انہوں نے یقین دلایا کہ حکومت ٹیکنالوجی، ٹیلی کام، ڈیجیٹل بینکاری اور مالیاتی شمولیت سے متعلق منصوبوں کی بھرپور معاونت جاری رکھے گی تاکہ ملک میں ڈیجیٹل مالیاتی نظام کو مزید وسعت دی جاسکے۔

تقریب سے خطاب کرتے ہوئے وزیر مملکت برائے خزانہ بلال اظہر کیانی نے کہا کہ حکومت ملک میں ڈیجیٹل معیشت کے فروغ کے لیے مختلف اقدامات کر رہی ہے۔

انہوں نے بتایا کہ حکومتی پالیسی میں ڈیجیٹل ادائیگیوں کے استعمال، نئی ٹیکنالوجی اور جدت کو فروغ دینے پر خصوصی توجہ دی جا رہی ہے تاکہ مالی معاملات کو زیادہ آسان اور جدید بنایا جاسکے۔

بلال اظہر کیانی نے ڈیجیٹل مالیاتی خدمات کے حوالے سے مختلف شعبوں میں مقررہ اہداف کے حصول کے لیے ہونے والی پیش رفت کا بھی ذکر کیا۔ ان کا کہنا تھا کہ حکومت اس بات کو یقینی بنانے کے لیے اقدامات کر رہی ہے کہ شہریوں کو حکومت کو کی جانے والی ہر قسم کی ادائیگی کے لیے کم از کم ایک ڈیجیٹل ادائیگی کا طریقہ دستیاب ہو۔

انہوں نے مثال دیتے ہوئے کہا کہ ٹول ٹیکس، موٹر وہیکل لائسنس فیس اور مختلف بلوں کی ادائیگی جیسے معاملات میں شہریوں کو ڈیجیٹل آپشنز فراہم کیے جا رہے ہیں۔

حکام کے مطابق ڈیجیٹل ادائیگیوں کے دائرہ کار میں اضافے سے نقد رقم پر انحصار کم کرنے، مالیاتی خدمات تک رسائی بہتر بنانے اور پاکستان کو جدید ڈیجیٹل معیشت میں تبدیل کرنے کی کوششوں کو تقویت ملے گی۔