9 مئی واقعات میں ملوث58 گرفتار ملزمان کے مقدمات فوجی عدالتوں میں بھجوا دیے، وقت آنے پر چیئر مین پی ٹی آئی کو بھی گرفتار کر لیا جائے گا: عامر میر

فیصل آباد:  نگراں وزیر اطلاعات عامر میر کا کہنا ہے کہ 9 مئی کے واقعات میں ملوث 58 گرفتار ملزمان کے خلاف مقدمات فوجی عدالتوں کو بھجوا دیے گئے ہیں۔  چیئرمین پی ٹی آئی کے خلاف بھی 9 مئی کے واقعات میں ملوث ہونے پر آٹھ مقدمات درج ہیں اور وقت آنے پر انہیں گرفتار کر لیا جائے گا۔

ان کا کہنا ہے کہ پی ٹی آئی کے چیئرمین عمران خان کے خلاف بھی 9 مئی کے واقعات میں ملوث ہونے پر آٹھ مقدمات درج ہیں اور وقت آنے پر انہیں گرفتار کر لیا جائے گا۔

صوبائی وزیر نے فیصل آباد میں وزیر صحت ڈاکٹر محمد اکرم، وزیر اوقاف بیرسٹر سید اظفر علی ناصر اور وزیر اعلیٰ تعلیم منصور قادر کے ہمراہ انتظامیہ کے ساتھ محرم الحرام کے سکیورٹی انتظامات کے حوالے سے اجلاس کے بعد پریس کانفرنس سے خطاب کرتے ہوئے کہا کہ 9 مئی کے واقعات میں ملوث 58 گرفتار ملزمان کے خلاف مقدمات فوجی عدالتوں کو بھجوا دیے گئے ہیں جبکہ سیکڑوں دیگر کو بھی گرفتار کیا گیا ہے اور ان کے خلاف مقدمات سول عدالتوں میں زیر سماعت ہیں۔

عامر میر نے کہا کہ نگراں وزیر اعلیٰ محسن نقوی نے پولیس کو 9 مئی کو مظاہرین پر گولی نہ چلانے کی ہدایت جاری کی تھی اور اس دن پنجاب میں کہیں بھی ایک گولی نہیں چلائی گئی۔ یہاں تک کہ فوج نے جناح  ہاؤس لاہور میں یا جی ایچ کیو راولپنڈی میں حملوں کے دوران ایک گولی بھی نہیں چلائی جب کہ حملوں کے دوران متعدد پولیس اہلکار زخمی ہوئے۔

چاروں وزراء نے فیصل آباد کے کمشنر اور ساہیوال اور سرگودھا ڈویژن کے کمشنرز سے محرم الحرام کے انتظامات کے حوالے سے ویڈیو لنک پر بریفنگ لی۔