اسلام آباد : وفاقی وزیر برائے مذہبی امور سردار یوسف نے کہا ہے کہ اس سال حج کے لیے اچھے انتظامات کیے گئے ہیں تاکہ عازمین کو بہتر سہولیات اور مکمل معلومات فراہم کی جا سکیں۔
کراچی کے حاجی کیمپ میں میڈیا سے گفتگو کرتے ہوئے انہوں نے کہا کہ سعودی عرب میں حاجیوں کے لیے اچھی رہائش کا بندوبست کیا گیا ہے، جبکہ مختلف زونز میں سہولیات کو مزید بہتر بنایا گیا ہے۔ انہوں نے بتایا کہ گرمی کے پیش نظر اے سی والے خیمے لگائے گئے ہیں، اور اس بار حاجیوں کے سامان کے لیے خیموں کی چھت پر جگہ دی گئی ہے، تاکہ نیچے جگہ کم نہ ہو۔
وفاقی وزیر کے مطابق ٹرانسپورٹ کا نظام بھی بہتر کیا گیا ہے، اور 70 فیصد حاجیوں کو میدان عرفات ٹرین کے ذریعے لے جایا جائے گا۔ سردار یوسف نے بتایا کہ اس سال سرکاری اسکیم کے تحت 89 ہزار حاجی فریضہ حج ادا کریں گے، اور ماضی میں 2013 سے 2018 کے دوران بھی سب سے بہتر اور سستا انتظام کیا گیا تھا۔
