اسلام آباد:وزیر مملکت برائے داخلہ طلال چوہدری نے کہا ہے کہ 30 اپریل کے بعد کوئی بھی غیر ملکی بغیر ویزا پاکستان میں مقیم نہیں رہ سکے گا۔ اسلام آباد میں پریس کانفرنس کرتے ہوئے انہوں نے واضح کیا کہ غیر ملکیوں کے انخلا کے لیے دی گئی مہلت میں توسیع نہیں کی جائے گی۔
انہوں نے کہا کہ غیر قانونی طور پر مقیم افغان شہریوں کو ملازمت دینے، گھر یا دکان کرایے پر دینے والوں کے خلاف بھی کارروائی کی جائے گی۔
طلال چوہدری نے بتایا کہ افغان حکومت سے رابطے جاری ہیں اور اس حوالے سے نائب وزیراعظم کی سربراہی میں ایک وفد جلد افغانستان روانہ ہوگا۔واضح رہے کہ یکم اپریل سے اب تک 40 ہزار سے زائد افغان شہری پاکستان سے واپس جا چکے ہیں۔
