میونخ : چیئرمین پیپلزپارٹی بلاول بھٹو زرداری نے میونخ سکیورٹی کانفرنس کے دوران جرمن ٹی وی کو انٹرویو دیتے ہوئے کہا کہ سابق امریکی صدر ڈونلڈ ٹرمپ "ڈیل میکر" ہیں اور پاکستان امریکی صدر کے ساتھ انگیج ہو سکتا ہے۔
بلاول بھٹو نے اس بات پر زور دیا کہ پاکستان ہمیشہ سے ممالک کے درمیان تعلقات کو بہتر بنانے اور پل کا کردار ادا کرنے میں پیش پیش رہا ہے۔ انہوں نے مزید کہا کہ بھارت کے ساتھ بھی امن کے قیام کی کوشش کی جا سکتی ہے، یا کم از کم تجارت اور انگیجمنٹ کے ذریعے تعلقات کو بہتر بنایا جا سکتا ہے۔
بلاول بھٹو کا کہنا تھا کہ پاکستان امریکا اور چین کے درمیان پل کا کردار ادا کر سکتا ہے، جبکہ کچھ ممالک امریکا اور چین کے درمیان موجود مسابقتی صورتحال کا فائدہ اٹھا رہے ہیں۔
