وزیراعظم کا کم آمدنی والے طبقے کو سستے گھروں کی فراہمی کا عزم، نجی شعبے کی شمولیت کی ہدایت

اسلام آباد: وزیراعظم شہباز شریف نے کہا ہے کہ غریب اور متوسط طبقے کو چھت فراہم کرنا حکومت کی اولین ترجیح ہے، جس کے لیے سستے گھروں کے منصوبوں میں نجی شعبے کی بھرپور حوصلہ افزائی کی جائے گی۔ اسلام آباد میں ہاؤسنگ سیکٹر کے حوالے سے منعقدہ ایک اعلیٰ سطحی اجلاس کی صدارت کرتے ہوئے وزیراعظم نے عام آدمی کے لیے رہائشی سہولیات بہتر بنانے کے لیے اہم ہدایات جاری کیں۔
وزیراعظم نے دورانِ اجلاس ہاؤسنگ پالیسی کے حوالے سے درج ذیل ترجیحات کا اعادہ کیا۔ کم آمدنی والے خاندانوں کے لیے سستے گھروں کے منصوبوں کو ترجیحی بنیادوں پر مکمل کیا جائے گا۔ وزیراعظم نے ہدایت کی کہ ہاؤسنگ سیکٹر میں نجی سرمایہ کاری کی راہ میں حائل رکاوٹیں دور کی جائیں تاکہ نجی شعبہ سستے گھروں کی تعمیر میں حکومت کا ہاتھ بٹا سکے۔
 رہائشی منصوبوں میں بجلی، پانی، گیس اور دیگر بنیادی سہولیات کی فراہمی کو یقینی بنانا حکومت کے ایجنڈے کا حصہ ہے۔شہباز شریف نے متعلقہ حکام کو سخت ہدایت کی کہ عام آدمی کو ہاؤس فنانس (گھر کے لیے قرضہ) کی سہولت مؤثر انداز میں پہنچانے کے لیے فوری اور عملی اقدامات اٹھائے جائیں۔ ان کا کہنا تھا کہ ہمارا مقصد ہے کہ وہ طبقہ جو اپنا گھر بنانے کی مالی سکت نہیں رکھتا، اسے آسان شرائط پر مالی معاونت فراہم کی جائے تاکہ ہر پاکستانی کا اپنے گھر کا خواب شرمندہ تعبیر ہو سکے۔
وزیراعظم نے زور دیا کہ تمام متعلقہ ادارے آپس میں ہم آہنگی پیدا کریں تاکہ ہاؤسنگ سکیموں کے عمل کو شفاف اور تیز رفتار بنایا جا سکے۔ انہوں نے واضح کیا کہ عوام کو ریلیف فراہم کرنے میں کسی قسم کی تاخیر برداشت نہیں کی جائے گی۔