ٹرمپ کا فلسطین کی ریاستی حیثیت تسلیم کرنے پر برطانوی وزیراعظم سے اختلاف

لندن: برطانیہ کے دورے کے دوران امریکی صدر ڈونلڈ ٹرمپ نے کہا ہے کہ فلسطین کو ریاست کا درجہ دینے کا معاملہ امن کے جامع منصوبے کے تحت ہی دیکھنا چاہیے۔ انہوں نے اس سلسلے میں برطانوی وزیراعظم کیئر اسٹارمر کے موقف سے اختلاف ظاہر کیا۔

صدر ٹرمپ نے کہا کہ فلسطین کو ریاست تسلیم کرنے سے قبل تمام متعلقہ فریقین کے مفادات کو مدنظر رکھتے ہوئے مکمل امن پلان تیار کرنا ضروری ہے۔ انہوں نے کہا کہ امریکہ اور برطانیہ کے درمیان مضبوط تعلقات قائم ہیں جو دفاع، تجارت اور سائنس و ٹیکنالوجی کے شعبوں میں تعاون کی عکاسی کرتے ہیں۔

دونوں رہنماؤں نے یوکرین میں جاری جنگ اور غزہ کی کشیدہ صورتحال پر بھی بات چیت کی۔ وزیراعظم کیئر اسٹارمر نے زور دیا کہ غزہ میں جاری لڑائی فوری ختم کی جائے اور قیدیوں کی رہائی یقینی بنائی جائے۔

صدر ٹرمپ نے روسی صدر ولادیمیر پیوٹن کے حوالے سے مایوسی کا اظہار کیا اور کہا کہ یوکرین تنازعہ پہلے کی نسبت زیادہ پیچیدہ ہو چکا ہے، تاہم مذاکرات سے اس کا حل ممکن ہے۔ انہوں نے اسرائیل اور غزہ کے تنازع کو بھی نہایت مشکل قرار دیا مگر امن کی امید کا اظہار کیا۔