حالیہ کشیدگی میں پاکستانی فیلڈ مارشل کو مدعو کرنا ہمارے لیے عزت کا باعث ہے،خواجہ آصف

اسلام آباد : وزیر دفاع خواجہ آصف نے کہا ہے کہ پاک-امریکہ تعلقات میں اس وقت جو گرم جوشی دکھائی دے رہی ہے، وہ پہلے کبھی نہیں دیکھی گئی۔ وزیر دفاع نے فیلڈ مارشل سید عاصم منیر کے اعزاز میں امریکی صدر کی جانب سے دیے گئے ظہرانے کو پاکستان کے لیے ایک بڑا اعزاز قرار دیا۔

خواجہ آصف کے مطابق، فیلڈ مارشل اور امریکی صدر ڈونلڈ ٹرمپ کی ملاقات طے شدہ شیڈول کے تحت ہو رہی ہے، جس میں اہم علاقائی امور پر بات چیت متوقع ہے۔ انہوں نے مزید کہا کہ پاکستان حالیہ عالمی بحران میں ایک مثبت اور اہم کردار ادا کر سکتا ہے اور امید ظاہر کی کہ ٹرمپ ایران کے حوالے سے کوئی اہم بیان دیں گے۔

بھارتی میڈیا کی تنقید پر وزیر دفاع کا کہنا تھا کہ اگر بھارت پریشان ہے تو پریشان ہی رہنے دیں۔ ان کا یہ بیان اس بات کی عکاسی کرتا ہے کہ پاکستان اپنے موقف پر ثابت قدم ہے اور علاقائی سیاست میں اپنی اہمیت کو تسلیم کروا رہا ہے۔