ڈونلڈ ٹرمپ ایران کے جوہری معاہدے پر دباؤ ڈالنے کے لیے محدود فوجی کارروائی پر غور کر رہے ہیں ، امریکی اخبار

واشنگٹن : امریکی اخبار وال سٹریٹ جرنل کی رپورٹ کے مطابق، امریکی صدر ڈونلڈ ٹرمپ ایران کو جوہری معاہدے پر رضامند کرنے کے لیے محدود فوجی کارروائی پر غور کر رہے ہیں۔ اس ممکنہ کارروائی میں ایران کے فوجی یا سرکاری تنصیبات کو نشانہ بنانے کی تجویز دی گئی ہے۔

رپورٹ کے مطابق، اس محدود حملے کا مقصد ایران پر دباؤ ڈالنا ہے تاکہ وہ نئے جوہری معاہدے کو قبول کرے۔ اگر ایران معاہدہ نہ کرے تو اس کارروائی کو وسیع جنگ میں بھی بدلنے کا امکان ہے۔

صدر ٹرمپ نے اس سے قبل ایران کے معاملے میں سفارتکاری کو ترجیح دینے کا عزم ظاہر کیا تھا، تاہم انہوں نے یہ بھی کہا ہے کہ اگر ضرورت پڑی تو فوجی طاقت استعمال کرنے سے گریز نہیں کیا جائے گا۔ ایک حالیہ اجلاس میں خطاب کرتے ہوئے امریکی صدر نے ایران کو خبردار کیا کہ اگر وہ معاہدہ نہ کرے تو اسے سنگین نتائج کا سامنا ہو سکتا ہے۔

انہوں نے مزید کہا کہ ایران کو کسی صورت ایٹمی ہتھیار رکھنے کی اجازت نہیں دی جائے گی اور اب وقت آ گیا ہے کہ ایران امن کا راستہ اختیار کرے۔