کراچی: سی ٹی ڈی کی بڑی کارروائی، ریلوے ٹریک اڑانے کا دہشت گردانہ منصوبہ ناکام

کراچی:کراچی میں قانون نافذ کرنے والے اداروں نے بروقت کارروائی کرتے ہوئے شہر کو ایک بڑی تباہی سے بچا لیا۔ محکمہ انسدادِ دہشت گردی (سی ٹی ڈی) نے گزشتہ رات ایک کامیاب آپریشن کے دوران ریلوے ٹریک پر تخریب کاری کا منصوبہ ناکام بناتے ہوئے 5 خطرناک دہشت گردوں کو گرفتار کر لیا۔
حکام کے مطابق خفیہ اطلاع پر کی گئی اس کارروائی میں گرفتار دہشت گردوں کا تعلق مبینہ طور پر بھارتی حمایت یافتہ کالعدم تنظیم 'بلوچستان ری پبلکن گارڈز' (BRG) سے ہے۔ گرفتار ملزمان کے قبضے سے بھاری مقدار میں جدید اسلحہ، ہینڈ گرینیڈز اور دھماکہ خیز مواد برآمد ہوا ہے جسے ریلوے لائنوں کو نشانہ بنانے کے لیے استعمال کیا جانا تھا۔
    دہشت گردوں نے کراچی سے اندرونِ ملک جانے والی مین ریلوے لائن کو دھماکے سے اڑانے کی منصوبہ بندی کر رکھی تھی۔    اس نیٹ ورک کا مقصد مسافر ٹرینوں کو نشانہ بنا کر بڑے پیمانے پر جانی نقصان پہنچانا اور ملک کے معاشی مرکز میں خوف و ہراس پھیلانا تھا۔
    گرفتار ملزمان سے تفتیش جاری ہے جس میں مزید اہم انکشافات اور نیٹ ورک کے دیگر کارندوں کی گرفتاری کا امکان ظاہر کیا جا رہا ہے۔