ایک ہفتے میں دوسری بڑی پیش رفت،ایران امریکہ کشیدگی میں کمی کا مشن؛ وزیرِ داخلہ محسن نقوی ہنگامی دورے پر تہران پہنچ گئے

اسلام آباد / تہران:ایران اور امریکہ کے مابین مستقل جنگ بندی کرانے اور مشرقِ وسطیٰ میں امن کے قیام کے لیے پاکستان کی پسِ پردہ سفارت کاری تیز ہو گئی ہے۔ پاکستان کے وفاقی وزیرِ داخلہ محسن نقوی ایک انتہائی اہم اور حساس مشن پر دوبارہ ایران پہنچ گئے ہیں، جہاں وہ ایرانی قیادت کے ساتھ اہم ترین ملاقاتیں کریں گے۔
ذرائع کے مطابق، وزیرِ داخلہ محسن نقوی اپنے اس دورے کے دوران امریکہ اور ایران کے مابین ممکنہ مذاکرات اور خطے میں جاری کشیدگی کے مستقل خاتمے کے حوالے سے ایرانی حکام سے اہم تبادلہ خیال کریں گے۔ پاکستان اس وقت دونوں ممالک کے مابین خلیج کو کم کرنے کے لیے ایک اہم ثالث کا کردار ادا کر رہا ہے۔
 سفارتی حلقوں میں اس دورے کو انتہائی اہم اور ہنگامی قرار دیا جا رہا ہے، کیونکہ وزیرِ داخلہ کا ایک ہفتے کے دوران ایران کا یہ دوسرا دورہ ہے۔گزشتہ ہفتے اپنے دورۂ تہران کے دوران محسن نقوی نے ایرانی صدر مسعود پزشکیان سمیت ایران کی اعلیٰ سیاسی و عسکری قیادت سے تفصیلی ملاقاتیں کی تھیں، جن کے تسلسل میں یہ موجودہ دورہ ہو رہا ہے۔
 ایران اور امریکہ کے مابین جنگ بندی کی راہ ہموار کرنے اور غلط فہمیوں کو دور کرنے کے لیے وفاقی وزیرِ داخلہ کا یہ مجموعی طور پر تیسرا دورہ ہے۔بین الاقوامی امور کے ماہرین کا کہنا ہے کہ ایک ہی ہفتے میں وزیرِ داخلہ کا دوبارہ تہران جانا اس بات کی علامت ہے کہ پسِ پردہ مذاکرات میں کوئی بڑی پیش رفت ہوئی ہے، اور پاکستان خطے کو کسی بڑے بحران سے بچانے کے لیے نہایت متحرک کردار ادا کر رہا ہے۔