اسلامک سالیڈیریٹی گیمز: ارشد ندیم نے جیتا گولڈ میڈل، پاکستان کا سر فخر سے بلند

لاہور: پاکستان کے مایہ ناز جیولن تھرو ایتھلیٹ ارشد ندیم نے سعودی عرب میں جاری اسلامی یکجہتی گیمز میں شاندار کارکردگی کا مظاہرہ کرتے ہوئے گولڈ میڈل اپنے نام کر لیا۔ ارشد ندیم نے جیولن تھرو کے فائنل میں 83.05 میٹر کی تھرو کر کے تمام حریفوں کو پیچھے چھوڑا اور ایک بار پھر پاکستان کا نام روشن کیا۔

یہ ارشد ندیم کی مسلسل دوسری بار اسلامی یکجہتی گیمز میں گولڈ میڈل جیتنے کی کامیابی ہے، جس سے پاکستان کا سر فخر سے بلند ہو گیا ہے۔ جیولن تھرو کے پہلے راؤنڈ میں ارشد ندیم نے 75.44 میٹر کی عمدہ تھرو کی، جس کے بعد یاسر سلطان نے 70.32 میٹر کی تھرو کی۔ دوسرے راؤنڈ میں بھی ارشد نے اپنی برتری برقرار رکھی اور 83.05 میٹر کی بہترین تھرو کی، جبکہ یاسر سلطان نے 74.43 میٹر تھرو کی۔

تیسرے راؤنڈ میں ارشد ندیم نے 82.48 میٹر کی ایک اور شاندار تھرو کی اور اپنی پہلی پوزیشن کو مزید مستحکم کیا، جب کہ یاسر سلطان نے 72.82 میٹر کی تھرو کی اور تیسرے نمبر پر رہے۔ چوتھے راؤنڈ میں ارشد نے 77.06 میٹر کی تھرو کی، جبکہ یاسر سلطان نے 73.78 میٹر کی تھرو کی۔ اس کے بعد بھی ارشد نے اپنی برتری قائم رکھی اور گولڈ میڈل جیتا۔

فائنل کے اختتام پر پاکستان کے یاسر سلطان نے چاندی کا تمغہ حاصل کیا، اور اسلامی یکجہتی گیمز میں پاکستان کے میڈلز کی تعداد چار ہو گئی۔ یہ گولڈ اور سلور میڈلز پاکستان کے لیے ایک تاریخی کامیابی ہیں، کیونکہ اس سے پہلے پاکستان نے باکسنگ میں دو برانز میڈلز جیتے تھے۔