اسلام آباد: پاکستان کے فاسٹ باؤلر حسن علی بھارت میں ہونے والے ورلڈ کپ کے لیے ٹیم میں شامل کیے جانے کے لیے پر امید ہیں۔ حسن علی کا کہنا ہے کہ ایک پیشہ ور کرکٹر ہوں اور کوچز اور انتظامیہ بھی میری کارکردگی سے مطمئن ہیں۔
حسن علی اس وقت جاری وائٹلٹی بلاسٹ میں برمنگھم بیئرز کی نمائندگی کر رہے ہیں۔ حسن محسوس کرتے ہیں کہ وہ فی الحال وائٹ بال کرکٹ کے لیے پی سی بی کے منصوبوں میں شامل نہیں ہیں۔ تاہم، ان کا مقصد اچھی کارکردگی کا مظاہرہ کرنا اور ورلڈ کپ اسکواڈ میں جگہ بنانا ہے۔
حسن نے میڈیا گفتگو کرتے ہوئے کہا کہ میں ٹی ٹوئنٹی بلاسٹ ٹورنامنٹ میں برمنگھم بیئرز کے لیے کھیل رہا ہوں۔ میں اچھی کارکردگی دکھانے کی بھرپور کوشش کر رہا ہوں، اپنی ٹیم کے لیے بہترین باؤلر بنوں اور اس بات کو یقینی بناؤں کہ میری کارکردگی میری ٹیم کی فتوحات میں اہم کردار ادا کرے۔ اور اگر قومی سلیکٹرز اور پاکستان کی ٹیم مینجمنٹ کو لگتا ہے کہ وہ میری کارکردگی سے خوش ہیں تو وہ مجھے ورلڈ کپ کے لیے غور کر سکتے ہیں.
انہوں نے کہا کہ ہر کرکٹر کا یہ خواب ہوتا ہے کہ وہ ورلڈ کپ میں اپنے ملک کی نمائندگی کرے اور ملک کے لیے ٹرافیاں جیتے اور میں جانتا ہوں کہ ٹرافیاں کیسے جیتنی ہیں کیونکہ مجھے آئی سی سی ٹورنامنٹس میں کھیلنے کا اچھا تجربہ ہے۔
حسن علی نے مزید کہا کہ میں واقعی اس کا منتظر ہوں کیونکہ میں پاکستان کے لئے کھیلنا چاہتا ہوں۔ میں کاؤنٹی میچوں میں اچھی کارکردگی دکھانے اور اپنی تال حاصل کرنے کی کوشش کر رہا ہوں۔ چاہے وہ پاکستان میں ڈومیسٹک کرکٹ ہو، کوئی بھی ٹی ٹوئنٹی لیگ ہو یا کاؤنٹی چیمپئن شپ میرا کام کارکردگی دکھانا ہے۔
ان کا کہنا تھا کہ اب تک میں کاؤنٹی چیمپئن شپ میں اپنی کارکردگی سے بہت خوش ہوں۔ میں ایک پیشہ ور کرکٹر ہوں اور کوچز اور انتظامیہ بھی میری کارکردگی سے مطمئن ہیں۔
واضح رہے واروکشائر کے لیے پانچ کاؤنٹی چیمپیئن شپ میچوں میں 22 وکٹیں لینے کے بعد حسن کو سری لنکا کے آئندہ دورے کے لیے پاکستان کے ٹیسٹ اسکواڈ میں شامل کیا گیا ہے۔
