لاہور: دہشت گردی کے بڑھتے ہوئے خطرات کے پیش نظر سی ٹی ڈی نے پنجاب بھر میں 166 انٹیلی جنس بیسڈ آپریشنز کیے، جس کے دوران 11 دہشت گرد گرفتار کر لیے گئے۔
سی ٹی ڈی کے ترجمان کے مطابق یہ کارروائیاں سرگودھا، راولپنڈی، پاک پتن، گجرات، چکوال، بہاولپور، بہاول نگر اور فیصل آباد میں کی گئیں۔ ان کارروائیوں میں میانوالی سے کالعدم تنظیم ٹی ٹی پی کے ایک خطرناک دہشت گرد کو بارودی مواد کے ساتھ گرفتار کیا گیا۔
گرفتار دہشت گردوں کے قبضے سے دھماکہ خیز مواد، آئی ای ڈی بم، 2 ڈیٹونیٹرز، 19 حفاظتی فیوز، 26 فٹ تار، پمفلٹس، نقدی اور پرائمہ کارڈ برآمد ہوئے۔ ان دہشت گردوں کی شناخت حیدر سلطان، ولی رحمان، زبیر، امین، اکبر، مقصود خان، عمیر، ظفر اقبال، ابراہیم قاسمی، محب اللہ اور صدام حسین کے ناموں سے کی گئی۔
حکام کے مطابق یہ دہشت گرد عوام میں خوف و ہراس پھیلانے کے لیے مختلف مقامات پر حملے کرنے کے ارادے رکھتے تھے۔ اس کے علاوہ، اس ہفتے 1475 کومبنگ آپریشنز کیے گئے جن میں 422 مشتبہ افراد کو گرفتار کیا گیا۔
سی ٹی ڈی حکام کا کہنا ہے کہ یہ آپریشنز صوبے کو محفوظ بنانے کے لیے کیے گئے ہیں اور دہشت گردی کے خاتمے کے لیے ادارہ بھرپور اقدامات کر رہا ہے۔
