AI کے جدید ٹولز انتہا پسند تنظیموں کے لیے ایک نیا ہتھیار، وائس ٹیکنالوجی سے پروپیگنڈا  ہونے لگا

کیلیفورنیا:مصنوعی ذہانت (AI) کے جدید ٹولز انتہا پسند تنظیموں کے لیے ایک نیا ہتھیار بن گئے ہیں۔ ماہرین کے مطابق، یہ گروہ AI کے ذریعے اپنے رہنماؤں کی آوازیں اور تقاریر دوبارہ تخلیق کر کے اپنی رسائی اور اثر و رسوخ بڑھا رہے ہیں۔

برطانوی اخبار دی گارڈین کے مطابق، آن لائن دہشت گردی پر نظر رکھنے والے ادارے ٹیک اگینسٹ ٹیررازم کے سینئر تجزیہ کار لوکاس ویبر نے بتایا کہ انتہا پسند گروہ AI سے لیس ترجمہ اور وائس ٹیکنالوجی استعمال کر کے اپنے پیغامات کو مختلف زبانوں میں جذبات اور نظریاتی شدت کے ساتھ پہنچا رہے ہیں۔

تجزیے کے مطابق، نیو نازی انتہا پسند گروہ AI وائس کلوننگ سافٹ ویئر کا استعمال کر کے ایڈولف ہٹلر کی تقاریر کے جدید انگریزی ورژنز تیار کر رہے ہیں، جو انسٹاگرام، ٹک ٹاک اور ایکس پر کروڑوں بار سنے جا چکے ہیں۔

گلوبل نیٹ ورک آن ایکسٹریمزم اینڈ ٹیکنالوجی کی رپورٹ کے مطابق، وائس کلوننگ سروسز جیسے ‘الیون لیبز’ سافٹ ویئر انتہا پسندوں کو اپنے پُرتشدد پیغامات کو جدید انداز میں پھیلانے میں مدد دے رہی ہیں۔ مثال کے طور پر، جیمز میسن کی کتاب "سیج" کو AI کی مدد سے آڈیو بُک میں تبدیل کیا گیا، تاکہ اس کے نظریات نوجوان ارکان تک زیادہ مؤثر انداز میں پہنچیں۔

ویبر کے مطابق دیگر میڈیا نیٹ ورکس بھی AI کے ذریعے سرکاری یا نظریاتی مواد کو ٹیکسٹ ٹو اسپیچ میں بدل کر پروپیگنڈا کی طاقت بڑھا رہے ہیں، جس سے تحریری مواد ایک مضبوط ملٹی میڈیا شکل اختیار کر رہا ہے۔